«Կենգուրու» միջազգային մաթեմատիկական մրցույթին այս տարի 3-12-րդ դասարանցի շուրջ 44.000 աշակերտ է մասնակցել Հայաստանի և Արցախի 1040 դպրոցներից:
Այս մասին այսօր լրագրողների և «Կենգուրուի» այս տարվա ութ հաղթողների հետ հանդիպման ժամանակ ասաց Հայաստանում մրցույթի կազմակերպիչ «Այբ» կրթական հիմնադրամի տնօրեն Դավիթ Սահակյանը:
«Կենգուրուն» այս տարի ունի 1469 մրցանակակիր աշակերտ, որոնցից 617-ը գրանցել են լավագույն արդյունք և արժանացել նաև պատվոգրերի, իսկ ութ հաղթողներն այսօր ՀՀ կրթության և գիտության նախարարությունում պարգևատրվեցին:
Դ. Սահակյանի խոսքով՝ հանրապետության մարզերն այս տարի աչքի են ընկել մասնակցության իրենց ակտիվությամբ, ավելին՝ ութ հաղթողներից չորսը մարզերի դպրոցներից են (4-րդ դասարանի աշակերտներ Զինա Ղազարյանը, Նաիրա Շահբազյանը և Էրիկ Մելիքյանը՝ Լոռու մարզից, իսկ Մերի Ավետիսյանը՝ Շիրակի մարզից), իսկ մյուս չորսը (Զարուհի Հակոբյան, Ալբերտ Գևորգյան, Էդուարդ Միհրանյան և Տիգրան Շախկյան)՝ Երևանի դպրոցներից ու վարժարաններից:
Կարդացեք նաև
Հիշեցնենք, որ «Կենգուրուն» արդեն վեցերորդ տարին անընդմեջ Հայաստանում անցկացվում է ՀՀ կրթության և գիտության և չորրորդ տարին՝ Արցախում ԼՂՀ կրթության և գիտության նախարարությունների հովանու ներքո:
ՀՀ ԿԳՆ հանրակրթության վարչության պետ Նարինե Հովհաննիսյանն էլ ասաց, որ իրենց համար առաջնային խնդիր է կրթության որակի բարելավումն ու շնորհալի երեխաների հայտնաբերումը, ուստի՝ տարբեր միջոցառումներ են կազմակերպվում՝ բացահայտելու և խրախուսելու առաջադեմ երեխաներին, քանի որ նրանք են մեր վաղվա հերոսներն ու ապագան. «Կենգուրուն» նմանատիպ միջոցառումներից մեկն է,- ասում է Ն. Հովհաննիսյանը,- և շատ ուրախալի է, որ տարեցտարի այն ավելի սիրելի է դառնում երեխաների կողմից՝ ինչ-որ տեղ վերածվելով նաև մաթեմատիկական տոնի»:
Հիշեցնենք, որ «Կենգուրուն» տրամաբանական և հետաքրքրաշարժ խնդիրներից կազմված մրցույթ է, որն ամեն տարի նույն օրն անցկացվում է ավելի քան 60 երկրում՝ մոտ 7 միլիոն դպրոցականների մասնակցությամբ:
Անդրադառնալով մրցույթին մասնակցելու ցանկությանն ու պայմաններին՝ «Կենգուրու» ծրագրի ղեկավար Շուշան Կարապետյանն ասաց, որ «Կենգուրուին» կարող են մասնակցել 3-12-րդ դասարանի բոլոր աշակերտները՝ անկախ մաթեմատիկական ունակություններից կամ առաջադիմությունից. «Կարևորը երեխայի ցանկությունն է՝ փորձել իր ուժերը մաթեմատիկայում, նորովի նայել այս հետաքրքիր առարկային,- ասում է Շ. Կարապետյանը,- ի վերջո, մրցույթի նպատակը մաթեմատիկայի հանդեպ համընդհանուր հետաքրքրություն առաջացնելն է և երեխաների համար այն առավել գրավիչ ու սիրելի դարձնելը»:
Սիրանուշ ՀԱՅՐԱՊԵՏՅԱՆ
