Վրաստանի կողմից ԵՄ Ասոցացման պայմանագրի ստորագրումից հետո Ջավախքում խուճապային տրամադրություններ չկան: Այսօր «Ազդակ» մամուլի ակումբում հավաստիացրեց ՀՀԿ խմբակցության պատգամավոր Տաճատ Վարդապետյանը`պատասխանելով լրագրողի այն մտահոգություններին` Եվրասիական տնտեսական միության ձգտող Հայաստանի համար խնդիր չի՞ առաջացնի Վրաստանի եվրոասոցացումն այն պարագայում, երբ Վրաստանում մեծ թվով հայկական համայնք կա, որի ներկայացուցիչները տարվա մեծ մասը ՌԴ են մեկնում`արտագնա աշխատանքի:
Պատգամավորը վստահեցրեց, որ ՀՀ եւ Վրաստանի նախագահի հանդիպումը Թբիլիսիում բավականին հուսադրող է Ջավախքի բնակչության համար, քանի որ մի շարք դրական միտումների մասին հայտարարություններ եղան:
Ի դեպ, Վրաստանի եվրոասոցացումը, ըստ ՀՀԿ-ական պատգամավորի, նաեւ Հայաստանի համար է դրական, քանի որ նա նախադրյալներ է տեսնում, որպեսզի վրացական կապիտալը մեր երկրում ներդնելով, արտադրանք ապահովվի ու այնուհետ այդ արտադրանքը եվրոպական շուկա արտահանել: Հայաստան-Վրաստան փոխհարաբերությունները ավելի բարեկամական դառնալու նախադրյալներ եւ հեռանկար ունեն: Նա ավելի իրատեսական է համարում վրացական կապիտալի ներհոսքը Հայաստան, քան հակառակը, քանի որ Հայաստանում արտադրվող ապրանքատեսակներն, իշխող կուսակցության ներկայացուցչի կարծիքով, առավել հետաքրքրություն են առաջացում ոչ թե եվրոպական, այլ եվրասիական շուկայում:
Վրաստանի եվրոասոցացումն ըստ Տաճատ Վարդապետյանի, չի նպաստի Վրաստանով հայերի արտագաղթին դեպի Եվրոպա: «Մտահոգությունը կիսում եմ, բայց չեմ կարծում թե արտագաղթն այդ ճանապարհով ավելի մեծ թափ կստանա: Ավելին, տեղում կարող են հեռանկարներ բացվել»,- ասաց նա:
Նելլի ԳՐԻԳՈՐՅԱՆ
Կարդացեք նաև
Իսկ ի՞նչու խուճապ պիտի առաջացնի: Ջավախքը Վրաստանի կազմում Հայաստանի համար ավելի ստրատեգիական է,քան եթե այն լիներ Հայաստանի կազմում: Ուղղակի հայերը պիտի ներդնեն Ջավախքում՝ հատկապես Ջավախքահայ սփյուռքը: