Հատված ԲՀԿ-ական պատգամավոր Միքայել Մելքումյանի հարցազրույցից:
– Պարոն Սելքումյան, ոչ իշխանական ուժերը հայտարարում են, որ դեմ են էլեկտրաէներգիայի սակագնի բարձրացմանը, այսօրվա (երեկվա) ասուլիսում էլ հայտարարում էին, որ սեպտեմբերին հանրահավաք կանեք։ Չե՞ք կարծում՝ եթե
քառյակից ամեն մեկն իր կուսակիցներից մի 200-300 հոգի բերեր հանձնաժողովի մոտ, բոլորովին այլ իրավիճակ կլիներ, միգուցե այլ որոշում կայացվեր կամ այդ օրվա ակցիան ձնագնդի էֆեկտ ստանար ու շարժման վերածվեր, որն ի վերջո կկասեցներ որոշման՝ ուժի մեջ մտնելը։
– Չէ, մենք այդպիսի խնդիր չէինք դրել, որ ամեն կուսակցություն մարդկանց ինչ-որ քանակ բերի եւ ոչ էլ ձնագնդու էֆեկտ լինի, պայթյունավտանգ, ցնցումային ինչ-որ
բաներ լինեն։ Մենք ընդամենը տեսել ենք, որ հանրային շարժում կա, եւ բացի այդ հանրային շարժումից, քառյակով հայտարարություն ենք արել, որ դեմ ենք էլեկտրաէներգիայի սակագնի թանկացմանը, եկել ենք հանձնաժողով, իսկ մինչ այդ
մենք հանձնաժողովի նախագահի եւ որոշ անդամների հետ քննարկել ենք, խորհրդարանում լսումներ են եղել, դեմ ենք արտահայտվել, հանձնաժողովի նիստին էլ եկել ենք, բերել ենք փաստարկներ, որին որեւէ մեկը որեւէ առարկություն չի
ներկայացրել։
Ինչ վերաբերում է, որ դրսում մարդիկ լինեին, հատուկ կազմակերպված տանեինք, մենք այդպիսի խնդիր չենք դրել բացարձակապես, եթե կա ինքնաբուխ հանրային շարժում, մենք կաջակցենք անպայման։
Կարդացեք նաև
– Քառյակի ասուլիսի ժամանակ նաեւ հայտարարվեց, որ այդ հարցով սեպտեմբերին հանրահավաք կլինի, միգուցե այդ հանրահավաքի անհրաժեշտությունն այսօ՞ր կար, ի՞նչ իմաստ ունի հանրահավաք անել որոշումը կայացնելուց եւ ուժի մեջ մտնելուց հետո։
– Նախեւառաջ, որոշումն ուժի մեջ է մտնում օգոստոսի 1-ից, մինչ հանրահավաքը ուրիշ խնդիրներ կան, որ մենք պետք է փորձենք առաջ շարժվել, եւ 2-րդ, դուք կարծում եք՝ եթե հանրահավաք անեինք, չեղյալ էին անելո՞ւ։ Եթե այդպես լիներ, մի 20 հատ հանրահավաք կանեինք։ Դա ձեւերից մեկն է, հանրությունը թող ինքն անի, մենք անպայման կաջակցենք։ Մեր օրակարգում դրա համար հանրահավաք անելու խնդիր չկա։ Պայքարի այլ միջոցներ ու ձեւեր կան։
Լուսինե ԲԱՐՍԵՂՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
