«Իրենք ճիշտ են այն առումով, որ այդքան ձախողումներից հետո, եթե այդպիսի արտահայտություն են անում, ուրեմն իրավունք ունեն: Մեզ տեղն է, եթե չենք կարողացել միասնական լինել և իրենց` գոյություն չունեցող, կեղծված, թույլ, կիսելյովների առջև խոնարհվող իշխանությանը փոխել»,-Aravot.am-ի հետ զրույցում արձագանքելով ՀՀԿ խմբակցության ղեկավար Վահրամ Բաղդասարյանի` «Ժառանգություն» կուսակցության համագումարին Րաֆֆի Հովհաննիսյանի հնչեցրած իշխանափոխության և միասնական հրապարակ ստեղծելու կոչերի վերաբերյալ դիտարկումներին՝ այսպես արձագանքեց «Ժառանգություն» կուսակցության փոխնախագահ Արմեն Մարտիրոսյանը:
Հիշեցնենք, որ «Ժառանգություն» կուսակցության հերթական համագումարում Րաֆֆի Հովհաննիսյանի` միասնական հրապարակի ստեղծման և իշխանափոխության կոչերին ի պատասխան Վահրամ Բաղդասարյանը մեղմ ասած թերահավատորեն էր արտահայտվել
ու նշել. «Անլուրջ եմ համարում նման հոխորտուն մտքերը, հեղափոխական կոչերը։ Մարտի մեկ են ուզո՞ւմ, ավելի քաղաքակիրթ ձեւեր կան…«Ժառանգություն» կուսակցության անդամները անգամ չեն կողմնորոշվում, համագործակցել իշխանության հետ, թե ոչ»:
Արմեն Մարտիրոսյանը նկատում է, որ Վահրամ Բաղդասարյանը, Գալուստ Սահակյանը և իշխանության մյուս ներկայացուցիչները ճիշտ են լինելու այնքան ժամանակ, քանի դեռ երկրում իշխանափոխություն չի եղել: Զարգացնելով սեփական սխալներն ընդունելու թեզը պարոն Մարտիրոսյանը նշեց. «Իրենք մեր անգործության, սխալ քայլերի պատճառով դեռ նմանատիպ քայլեր ու արտահայտություններ անելու իրավունք ունեն: Սա ընդունեք որպես պատասխան»:
Մեր հստակեցմանը, այն, որ Վահրամ Բաղդասարյանը հիշեցնում է մարտի 1-ի մասին սա ընդունենք որպես սպառնալի՞ք թե՞ զգուշացում, պարոն Մարտիրոսյանն այսպես արձագանքեց. «Մարտի մեկն արդեն անցած էտապ է: 2008-ը չէ, և իշխանությունն իր ռեսուրսներով ու ամրությամբ այն իշխանությունը չէ. ընդամենը մեկ անգամ հնարավոր է թույլ տալ կրակել, բայց երկրորդ անգամ ոչ ոք թույլ չի տա: Այնպես որ տեղին չէ ահաբեկել մարտի մեկով, մենք դրանից վախեցողը չենք: Մարտի մեկ հիշեցնող իշխանությունն է մարտի մեկ ուզողը, եթե իրենք ուզում են մարտի մեկ, դա ուրիշ խնդիր է: Ընդդիմությունը ոչ լծակներ ունի, ոչ մարդասպաններ, որ կարող են դիմակներով կրակել. դա իշխանության մենաշնորհն է»:
Կարդացեք նաև
«Ժառանգության» վերաբերյալ դիտարկումներին ի պատասխան Արմեն Մարտիրոսյանը հիշեցրեց, որ իրենք պահանջում են ամբողջական արմատական իշխանափոխություն և համակարգային փոփոխություններ:
Տաթև ՀԱՐՈՒԹՅՈՒՆՅԱՆ
