Պոլսո Հայոց պատրիարքական փոխանորդ Արամ արքեպիսկոպոս Աթեշյանը դատական հայց է ներկայացրել ոմն Քեմալ Թայֆուն Նարջինի դեմ, որը ներկայացել է որպես կառավարության աշխատակից և 6000 լիրա (մոտ 1 միլիոն դրամ) վերցրել իր ծառայությունների դիմաց, հայտնում է «Հուրիեթ» թերթը:
Աթեշյանի պատմելով՝ Նարջինը եկել է իր մոտ և պնդել, որ իրեն «նվեր» է հարկավոր, որպեսզի ավարտին հասցնի «Սանասարյան Հան» շենքը Պոլսո Հայոց պատրիարքարանին վերադարձնելու գործը: Շենքը հայ համայնքին է վերադարձվում Թուրքիայում ազգային փոքրամասնություններից առգրավված գույքերը վերադարձնելու ծրագրի շրջանակում:
36-ամյա Նարջինը մեղադրվում է խարդախության և պետական ինստիտուտի անվանարկման մեջ, որը նրան սպառնում է մինչև 7 տարվա ազատազրկում:
Նարջինը Աթեշյանին հանձնել է Թուրքիայի վարչապետի տարբերանշանով թերթիկ, այնուհետև «նվեր» է խնդրել արքեպիսկոպոսից: Աթեշյանը սկզբում 3000 լիրա է տվել, սակայն դա չի բավարարել Նարջինին և կրոնական առաջնորդը ևս 3000 լիրա է ավելացրել:
Կարդացեք նաև
Պարզելով, որ թերթիկը կեղծ է՝ Աթեշյանը կապ է հաստատել Եվրամիության կապերի հետ հարցերով նախարար Էգեմեն Բաղըշի հետ և պատմել ստեղծված իրավիճակը:
Աթեշյանի փաստաբան Ալի Էլբեյօղլուն, հայտնել է, որ «Սանասարյան Հան»-ը վերադարձնելու մասին տեղյակ են եղել միայն Աթեշյանը, վարչապետ Ռեջեփ Թայիփ Էրդողանը և Բաղըշը. «Մի մարդ գնում է պատրիարքի մոտ մի հարցով, որ միայն երեք հոգու է հայտնի և ասում, որ «Հան»-ը կվերադարձվի: Սա 3000 կամ 6000 լիրայի հարց չէ. Սա պարզ հարց չէ, սա առեղծված է», – ասել է Էլբեյօղլուն:
Պատրաստեց Հովհաննես ԻՇԽԱՆՅԱՆԸ
