Տեղեկացրել էինք, որ Ճարտարապետության եւ շինարարության պետական համալսարանի քննությունների պահանջներից դժգոհ ուսանողներին ընդունել է ԿԳ նախարարության բարձրագույն եւ հետբուհական մասնագիտական կրթության վարչության պետ Ռոբերտ Սուքիասյանը եւ առաջարկել խնդիրները շարադրել ԿԳ նախարարին եւ Գնահատման եւ թեստավորման կենտրոնի տնօրենին ուղղված նամակով:
Հրապարակվել է նաեւ բուհի տեսակետը :
Խնդրի առնչությամբ Aravot.am-ի հետ զրույցում Գնահատման եւ թեստավորման կենտրոնի արտաքին համագործակցության բաժնի պետ Արա Իսպիրյանն էլ նշեց, որ որքանով տեղյակ են մամուլից, քննական հանձնաժողովը գործել է իրեն վերապահված լիազորությունների շրջանակում: «Ինչ վերաբերում է վերահսկմանը, ԳԹԿ-ն չի վերահսկում ներբուհական քննությունների պրոցեսը, դրանք բուհերի ներքին քննություններն են, որոնք բուհերն են իրականացնում ու կազմակերպում, մենք պատասխանատու ենք միայն միասնական եւ կենտրոնացված քննությունների համար: ԳԹԿ-ն իրավասու չէ հարցումներ անել կամ ճշգրտել՝ ի՞նչ խախտումներ են եղել: Ինչ վերաբերում է քննությունների անցկացման կարգին, այն հաստատում է կառավարությունը: ԳԹԿ-ն ընդամենը ներբուհական քննությունների հանձնաժողովի կազմն է հաստատում, ընդ որում հանձնաժողովի անդամները ներկայացվում են բուհերի կողմից»:
Գոհար ՀԱԿՈԲՅԱՆ
