«Պետք չէ մոռանալ, որ ԵԱՀԿ խորհրդարանական վեհաժողովի նստաշրջանն անցկացվում է մի երկրում, որտեղ խախտվում են մարդու իրավունքները»,-հուլիսի 2-ին Բաքվում ԵԱՀԿ ԽՎ լիագումար նիստում իր ելույթի ժամանակ ասել է դանիացի պատգամավոր Կարստեն Լաուրիտցենը, փոխանցում է «Կոնտակտ»-ը:
«Այստեղ՝ ֆոյեում մենք ցանկանում էինք հանդիպել ընդդիմադիր կուսակցություններից մեկի առաջնորդի հետ, բայց մեզ թույլ չտվեցին: Ադրբեջանի ներկայացուցիչները հիմնավորեցին դա նրանով, որ նրա «այստեղ գտնվելը չափազանց վտանգավոր է»: Սակայն նա ընդամենը ընդդիմադիր կուսակցության ղեկավար է», – ասել է Լաուրիտցենը՝ նշելով, որ այդ փաստն արդեն ապացուցում է, որ Ադրբեջանում քաղաքական ազատությունների խնդիր կա:
Պատգամավորը ԵԱՀԿ ԽՎ ղեկավարներին կոչ է արել նիստերն անցկացնել այնպիսի երկրներում, որտեղ մարդու հիմնարար իրավունքները հարգվում են, ինչպես նաև ապահովել պատգամավորների, լրագրողների և ակտիվիստների հետ հանդիպումները:
«Կոնտակտ»-ը նշում է, որ հունիսի 30-ին Ադրբեջանի ազգային անվտանգության ծառայությունը խափանել է ԵԱՀԿ ԽՎ անդամների հանդիպումը Ժողովրդական ճակատ կուսակցության առաջնորդ Ալի Քերիմլիի հետ:
Կարդացեք նաև
Պատրաստեց Հովհաննես ԻՇԽԱՆՅԱՆԸ
