Ի պաշտպանություն ազատամարտիկ Վոլոդյա Ավետիսյանի հանձնախմբի համակարգող Գագիկ Սարուխանյանը Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի գրասենյակ մուտքագրեց Ազգային ժողովի մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանի միջնորդությունը: Հանձնաժողովի նախագահը դիմել է նախագահող դատավոր Լևոն Ավետիսյանին. «Ազատամարտի տարիներին Վ. Ավետիսյանը եղել է Լեոնիդ Ազգալդյանի տեղակալը մարտական պատրաստության գծով, մասնակցել է Վարդենիսի պաշտպանությանը, Քարվաճառի, Մարտակերտի և այլ վայրերի ազատագրմանը: Վոլոդյա Ավետիսյանը վեց երեխաների հայր է: Ներկայումս անազատության մեջ գտնվելու պատճառով նա չի կարողանում աշխատել, ինչի հետևանքով նրա ընտանիքը հայտնվել է ծանր սոցիալական դրության մեջ»,- ասված է միջնորդության մեջ:
Հանձնաժողովի նախագահը հավելել է, որ հետևում է Վոլոդյա Ավետիսյանի դատավարությանը. «Մեր գնահատմամբ մեղադրանքները հիմնավորված չեն»:
Նա միջնորդում է կայացնել արդար դատավճիռ:
Ռ.Մ.
