Վանաձորի համայնքի ավագանին այսօր կայացած արտահերթ նիստի ժամանակ որոշում է կայացրել Վանաձորի համայնքի կողմից բնակարան ձեռք բերելու և Հասմիկ Սահակյանի ընտանիքին այն վարձակալությամբ հատկացնելու մասին:
Ավագանու անդամ Արամ խաչատրյանը համաձայն չէ կայացված որոշման հետ:
Երեկ նա բոյկոտել էր ավագանու նիստն ու հրաժարվել մասնակցել քվեարկությանը:
Համաձայն շրջանառվող լուրերի`Վանաձորի քաղաքապետ Սամվել Դարբինյանի որոշմամբ ու առաջարկությամբ երեկ նիստի օրակարգ ընդգրկվել է մի նախագիծ, ըստ որի` նախատեսվում է համայնքի բյուջեի միջոցներով քաղաքի էլիտար շենքերից մեկում բնակարան գնել ու այն վարձակալությամբ տրամադրել անապահով ընտանիքներից մեկին:
Արամ Խաչատրյանը, սակայն, Aravot.am–ի հետ զրույցում նկատում է, որ անհրաժեշտություն չկար դեռ չկառուցված էլիտար շենքում բնակարան վարձակալություն տալու:
«Գլխավոր խնդիրը ոչ թե այդ կնոջը բնակարանով ապահովելն է, այլ այն, որ այդ բնակարանը վաճառվի: Քաղաքում բազմաթիվ խնդիրներ կան, որոնք լուծման կարիք ունեն: Շենքի շինարարությունը ավարտված չէ, եւ անգամ եթե այդ բնակարանը հիմա վարձակալության տան, քաղաքացին չի կարող այնտեղ բնակվել: Ես առաջարկեցի, որ հարցը հանվի օրակարգից եւ հետաձգվի մինչեւ շենքի շահագործումը»,-ասում է ավագանու անդամը:
Նա նշում է, որ եթե ցանկության կա օգնելու կնոջը, կարելի է օգնության կարգով այլ շենքում նրան բնակարան հատկացնել, ոչ թե էլիտարում:
Կարդացեք նաև
Անուշ ԲՈՒԼՂԱԴԱՐՅԱՆ
