Էլեկտրաէներգիայի սակագնի թանկացման որոշումը լսելուց հետո հանրային ծառայությունները կարգավորող հանձնաժողովի շենքի բակում հավաքված քաղաքացիները թանկացման համար առաջինը շնորհավորեցին Երեւանի փոխոստիկանապետ Վալերի Օսիպյանին, ապա ոստիկաններին:
Մի քանի քաղաքացի էլ մոտեցան փոխոստիկանապետին ու սկսեցին հարցերի տեղատարափ:
«Չե՞ք ուրախանում»,- հարցին՝ պարոն Օսիպյանը զարմանքով պատասխանեց. «Ինչո՞ւ ուրախանանք, կարո՞ղ է ոստիկանների գրպանին չի կպնում»:
Մի քաղաքացի էլ վրա տվեց.«Պարոն Օսիպյան, շնորհավորում եմ, ձեր ուզածին հասաք»:
Կարդացեք նաև
Պարոն Օսիպյանն էլ քաղաքացիների հետ զրույցում պնդում էր, որ իրենք էլ են ընդունում, որ Հայաստանում կան իրավագիտակից քաղաքացիներ, բայց այդ քաղաքացիները պետք է գործեն օրենքի սահմաններում:
Այդ պահին մի կին զրույցի մեջ մտավ ու հակադարձեց. «Գիտակից քաղաքացին այդ փողը որտեղի՞ց է տալու, գողություն անի՞ ձեր նման»:
Հետո, երբ նկատեց, որ փոխոստիկանապետն իր հարցերին չի պատասխանում պնդեց. «Քեզ եմ հարցնում»:
Լեզվակռիվ սկսվեց, փոխոստիկանապետը նկատեց.«Քեզ չէ, Ձեզ»:
Իսկ կինը հակադարձեց.«Էդքան կա՞ս»:
Պարոն Օսիպյանն էլ պատասխանեց.«Իսկ դուք էդքան կա՞ք»:
«Այո’, ոչ մեկի խամաճիկը չեմ»,- շարունակեց կինը:
Պարոն Օսիպյանը կնոջը ամոթանք տվեց, հետո հորդորեց մի քիչ բարի լինել:
Տիկինն ավելի ոգեւորվեց ու պնդեց, որ էնքան բարի է, որ.«Ես էնքան բարի եմ, որ դուք հլը սաղ եք մնացել»: Հետո էլ պարոն Օսիպյանի դիտարկմանը, թե՝ երեւում է, պատասխանեց.« Իսկ ի՞նչս էր պակաս, կնիկդ կերազի իմ տեսքին լինի»:
Արփինե ՍԻՄՈՆՅԱՆ
բայց էս մարդու գործն էլ գործ չի