«Հանրային ծառայությունները կարգավորող հանձնաժողովի նիստին չեն մասնակցել ո՛չ Ֆինանսների, ո՛չ Էկոնոմիկայի, ո՛չ Էներգետիկայի նախարարները: Թքած ունեն, որովհետև էս հիմնարկին հրահանգել են սուսուփուս կոճակի դեր աշխատել և հինգ կոճակ աշխատեց»,- էլեկտրաէներգիայի սակագնի բարձրացման որոշման ընդունումից հետո ցուցարար քաղաքացիներին մոտենալով՝ հայտարարեց ԱԺ ՀԱԿ խմբակցության քարտուղար Արամ Մանուկյանը: Հետո հեգնեց. «Եթե վիրավորում եմ իրենց, թող ինձ դատի տան` հինգ հատ կոճակ քվեարկեց»:
Նրա խոսքով, Ազգային ժողովի պատվիրակությունը կառուցողական առաջարկ է ներկայացրել` ժամանակ խնդրել հիմնավոր ուսումնասիրելու փաստերը, բայց. «Այս առաջարկը չանցավ: Այսինքն` ձեր ցանկացած կոշտ դիրքորոշում, ցանկացած պահանջ մեղմ է, կարող եք ավելին պահանջել, բայց պահանջելու համար, ներող կլինեք, նաև քանակ է պետք»:
Ակցիայի մասնակիցներն էլ պատգամավորներին խնդրեցին միջնորդել, որ հանձնաժողովի նախագահ Ռոբերտ Նազարյանն իջնի և անձամբ բացատրություններ տա: Բայց պարոն Մանուկյանը նկատեց. «Փոխանցող լինեի, ես կբերեի կամ չէի թողնի քվեարկեին»:
Պատգամավորների հեռանալուց հետո ակտիվիստները որոշեցին վաղը երեկոյան էլեկտրաէներգիայի գնի թանկացման հարցով հավաքվել Մաշտոցի պուրակում՝ քննարկելու իրենց անելիքները:
Կարդացեք նաև
«Սրանով մեր պայքարը չի ավարտվելու, այլ սկսվելու է: Սրանով առաջին քայլն ենք անում այս ապօրինի որոշման դեմ: Եվս մեկ անգամ տեսանք, որ գոռալով, կանչելով ոչինչ չի փոխվելու: Մինչեւ Հայաստանի քաղաքացիները դուրս չգան լուրջ պայքարի, քաղաքացիական անհնազանդությունների, իշխանությունները եւ իրենց մանկլավիկները չեն գնալու որեւէ զիջման»,- հայտարարեց Հայկ Ավետիսյանը:
Մինչ հանրային ծառայությունները կարգավորող հանձնաժողովում քննարկվում էր էլեկտրաէներգիայի սակագնի թանկացման հարցը, հանձնաժողովի շենքի բակում ոստիկանների եւ ակտիվիստների միջեւ փոքրիկ միջադեպեր գրանցվեցին:
Քաղաքացիները, ի նշան բողոքի, որ իրենց ներս չեն թողնում հանձնաժողովի շենք, փակեցին փողոցը՝ նստելով հենց փողոցի կենտրոնում:
Ոստիկանները նրանց գրկած հեռացրին փողոցից, իսկ Երեւանի փոխոստիկանապետ Վալերի Օսիպյանը հրահանգ տվեց՝ ոչ ոքի բերման չենթարկել, այլ պարզապես հեռացնել փողոցից: Քիչ անց քաղաքացիներն իրենք փողոցից դուրս եկան:
Արփինե ՍԻՄՈՆՅԱՆ
