Արաբագետ Սարգիս Գրիգորյանն այսօր «Ուրբաթ» մամուլի ակումբում, խոսելով Իրաքի եւ Սիրիայի մի մասը զավթած «Իրաքի եւ Լեւանտի իսլամական պետություն» ծայրահեղական շարժման հռչակած նոր խալիֆայության ստեղծման մասին, նշեց, որ այդ կառույցը իր վերահսկողության տակ ունի բազմաթիվ տարածքներ, զգալի զինուժ, ֆինանսական ռեսուրսներ եւ առաջնորդ, որոնք էլ կառույցը բավական ազդեցիկ գործոն կդարձնեն տարածաշրջանում, եւ որը կկարողանա խաղի կանոններ թելադրել: Խալիֆայության առաջնորդն է Աբու Բաքար ալ-Բաղդադին:
Արաբագետի դիտարկմամբ՝ 2013 թվականի կեսերից Սիրիայում արդեն որոշակի տարածքներ անցել էին խալիֆայության վերահսկողության տակ, իսկ 2013 թվականի վերջին եւ 2014-ի սկզբին կառույցը ակտիվություն սկսեց ցուցաբերել Իրաքում. «Կարելի է ասել, որ այսօրվա դրությամբ կառույցը ընդլայնում է իր սահմանները եւ առավել լայն տարածքներ է ընդգրկում իր նոր հայտարարած իսլամական պետության մեջ»:
Պրն Գրիգորյանի համոզմամբ՝ կառույցի ներսում մյուս կարեւոր գործոնը դրա ռազմական ներուժն է , որը համալրվում է աշխարհի տարբեր ծայրերից իսլամականներով. «Ընդ որում՝ մեր հարեւան Ադրբեջանի իսլամականները անդամագրվում են հենց այս կառույցին»: Արաբագետի խոսքով՝ կառույցը իր ռազմական գործողությունների թիրախ ընտրում է բանտերը. «Տեղեկություն կա, որ Աբու Բաքար ալ-Բաղդադին ինքն է գնում բացում բանտերի դռները, ազատում բանտարկյալներին եւ դարձնում իր կառուցի անդամ»:
Սարգիս Գրիգորյանը նաեւ տեղեկացրեց, որ նոր խալիֆայությունը ունի ֆինանսական լուրջ ներուժ: «Փորձագետներից շատերի կարծիքով կառույցի ինքնաֆինանսավորման գործակիցը բավական բարձր մակարդակի վրա է:
Նրանց առաջնորդը լրատվամիջոցները նույնպես օգտագործում է իր օգտին եւ կարողանում է ԶԼՄ-ների միջոցով քարոզել իր հայացքները»:
Արաբագետը հավելեց, որ հռչակված խալիֆայության սահմանները առնչվում են Հալեպ քաղաքի հետ: «Վտանգ կա, որ որպես թիրախ իսլամիստների կողմից կարող են ընտրվել հենց Հալեպը եւ Հալեպի հարակից տարածքները: Նման պետությունը լուրջ գլխացավանք կարող է հանդիսանալ տեղանքում բնակվող փոքրամասնությունների համար, այդ թվում նաեւ հայկական համայնքի համար»:
Կարդացեք նաև
Էլյա ՀՈՎՀԱՆՆԻՍՅԱՆ
