ԵՊՀ-ում հունիսի 30-ին մեկնարկել է «Սահմանադրական զարգացումների առանձնահատկությունները ժամանակակից աշխարհում» խորագրով միջազգային ամառային դպրոցը:
ԵՊՀ իրավագիտության ֆակուլտետի նախաձեռնած և ՀՀ Սահմանադրական դատարանի աջակցությամբ անցկացվող ամառային դպրոցը տևելու է հունիսի 30-ից հուլիսի 5-ը:
Հիմնական նպատակն է ժամանակակից աշխարհում ընթացող սահմանադրական զարգացումների առանձնահատկությունների բացահայտումը, ոլորտի հիմնախնդիրներն ուսումնասիրող ուսանողների որակյալ վերապատրաստումը, նրանց տեսական ու պրակտիկ գիտելիքների մակարդակի բարձրացումը, ինչպես նաև նշված բնագավառին առնչվող հետազոտություններ իրականացնող տեսաբանների և պրակտիկ աշխատողների միջև միջազգային համագործակցության և փոխօգնության մշակույթի ձևավորումն ու խթանումը:
«Կարծում եմ՝ սա իրոք լավ դպրոց կհանդիսանա մեր ուսանողների և հյուրերի համար, որպեսզի նրանք կարողանան քննարկումների ընթացքում փոխադարձաբար հարստացնել միմյանց գիտելիքները: Դպրոցի կազմը պատահական չի ընտրված. մեր հյուրերը հիմնականում Արևելյան Եվրոպայի այն երկրներից են, որոնք ոչ վաղ անցյալում գրեթե նույն կարգավիճակում էին գտնվում, ինչ Հայաստանը, և որոնք ունեն մեզ համար օգտակար ասելիք»,- ամառային դպրոցի կարևորությունն է ընդգծում Իրավագիտության ֆակուլտետի դեկան Գագիկ Ղազինյանը:
Միջազգային ամառային դպրոցն ունի լայն ընդգրկում և համախմբում է ինչպես հայաստանյան, այնպես էլ օտարերկրյա պետություններ ներկայացնող տեսաբանների, պրակտիկ աշխատողների, սահմանադրական զարգացումների գործընթացներում ներգրավված փորձագետների, ինչպես նաև տարբեր իրավաբանական բուհեր ներկայացնող ուսանողների:
Կարդացեք նաև
«Այս թեման շատ արդիական է Հայաստանի Հանրապետության համար, քանի որ այժմ մենք գտնվում ենք սահմանադրական բարեփոխումների գործընթացում, և պատրաստման ընթացքի մեջ է այդ բարեփոխումների հայեցակարգը»,- նշեց ՀՀ Սահմանադրական դատարանի նախագահի խորհրդական Անահիտ Մանասյանը:
Ոլորտում իրենց ունեցած փորձը ներկայացնելու և նորը ձեռք բերելու համար Հայաստան են ժամանել մասնագետներ Ուկրաինայից, Չեխիայից, Հունգարիայից, Լիտվայից, Վրաստանից և Սլովակիայից: Ամառային դպրոցին մասնակցում են նաև հայ մասնագետներ ու ԵՊՀ ուսանողներ:
«Սեփական փորձով ասեմ, որ շատ կարևոր է միջազգային համագործակցության հիմքերը երիտասարդ տարիքում դնելը, քանի որ դրանք լինում են արդյունավետ ամբողջ կյանքի համար»,- դիմելով ամառային դպրոցի մասնակիցներին՝ նշեց ԵՊՀ գիտական քաղաքականության և միջազգային համագործակցության գծով պրոռեկտոր Գեղամ Գևորգյանը:
Հենց այդպիսի մի համագործակցության ակնկալիքով էլ Հայաստան է ժամանել Լիտվայի Միկոլաս Ռոմերիսի համալսարանի ուսումնական աշխատանքների գծով պրոռեկտորի տեղակալ Եվա Դևյատնիկովայտեն. «Այստեղ եմ, որպեսզի աշխուժացնեմ փոխգործակցությունը մեր և ԵՊՀ-ի միջև»:
Նշենք, որ Եվա Դևյատնիկովայտեն նաև նվեր ուներ. նա Իրավագիտության ֆակուլտետին նվիրեց Լիտվայի սահմանադրությունը՝ թարգմանված 13 լեզուներով:
ԵՊՀ սահմանադրական իրավունքի ամբիոնի վարիչ Գևորգ Դանիելյանն էլ կարծում է, որ այս միջոցառումը շատ հարուստ նյութ կտա արտասահմանյան գործընկերներին մեր երկրի իրավական համակարգը ճանաչելի դարձնելու առումով:
ԵՊՀ
