Ուղեւորության, հանգստի եւ ամռան տապին դիմանալու ճիշտ կանոնները հղիներին մեկնաբանում է բժիշկը
Ուղեւորության մեկնելու այս թեժ ու շոգ սեզոնին շատ հղիներ զգուշանում են մեկնել արտերկիր, հատկապես` ծովափնյա: Մանկաբարձ-գինեկոլոգ Պավել Սոցկին վստահեցնում է` ուղեւորության մեկնելը ոչ թե վտանգավոր է, այլ` օգտակար: Այսօր «Անալիտիկ» ակումբում բժիշկ Սոցկին ասաց, որ ցանկալի է ուղեւորության մեկնել մինչեւ 7 ամսական հղիությունը, դրանից բարձրը` ռիսկային է: Բժիշկը խորհուրդ տվեց ուղեւորության համար «զինվել» շատ ջրով, դեղարկղով, տոնոմետրով: Ընդ որում, եթե մեքենայով են ուղեւորվում, ապա անհրաժեշտ է մեքենայում նստած դիրքերը փոխել, ճանապարհին հաճախ կանգնել ու դուրս գալ քայլելու:
Պարոն Սոցկու խոսքերով` եթե հղին ծովափնյա հանգստի է մեկնել, ապա խորհուրդ է տրվում միայն առավոտյան եւ երեկոյան ժամերին ծովափին լինել, բացի այս, ջուրը մտնել միայն այն ժամերին, որ այն արդեն տաք լինի, եւ ափից հեռու չլողալ, քանի որ հղիների մոտ ջղաձգումներ շատ են լինում, ուստի հնարավոր է եւ օգնության կարիք ունենան:
Հղիներին նաեւ խորհուրդ չի տրվում լողալ լողավազաններում, քանի որ ինֆեկցիաներ վերցնելու վտանգ կա:
Պավել Սոցկու ներկայացմամբ` հղիները պետք է կանոնավոր սնվելու եւ հանգստանալու ռեժիմ ունենան` սնվել օրը 5-6 անգամ` քիչ չափաբաժիններով, օրվա ընթացքում անպայման պառկել հանգստանալու, բայց նաեւ անպայման զբոսնել, շարժումը հղիների համար շատ կարեւոր է եւ անհրաժեշտ:
Կարդացեք նաև
Բժիշկը խորհուրդ է տալիս շատ միրգ ու բանջարեղեն ուտել, իսկ ալերգիկ հղիները պետք է խուսափեն ելակից եւ նարնջից. ալերգիկ հղիները դրսում զբոսնելուց հետո պետք է անպայման լվանան իրենց մազերը, որովհետեւ մազերի մեջ մնում են այս եղանակին ծաղիկներից եւ բույսերից արտադրվող այն նյութերը, որոնք ոմանց համար ալերգեն են:
Նելլի ԲԱԲԱՅԱՆ
