«Ծրագրի առանձնահատկությունն այն է, որ միասնական փաստաթղթի շրջանակներում նախատեսվում են համակարգային տրամաբանական կապի մեջ գտնվող այնպիսի միջոցառումներ, որոնք վերաբերում են պետական ամենատարբեր ոլորտներին»,- այսօր ՄԱԿ-ում Մարդու իրավունքների պաշտպանության ազգային ռազմավարությունից բխող միջոցառումների ծրագրի մեկնարկին հայտարարեց ՀՀ վարչապետ Հովիկ Աբրահամյանը:
ՀՀ վարչապետը նկատեց, որ ՀՀ-ում մարդու իրավունքների պաշտպանության երաշխիքների զարգացման տեսանկյունից կարևորագույն դերակատարություն ունեցավ 2012 թվականին ՀՀ Նախագահի կարգադրության հիման վրա ստեղծված Մարդու իրավունքների պաշտպանության ազգային ռազմավարությունը: Հովիկ Աբրահամյանը հավելեց. «Այն կարելի է համարել իրավունքների պաշտպանության ոլորտում միասնական և համակարգային քաղաքականության իրականացման կարևոր գործիք, որը նպատակ ունի ապահովել Սահմանադրությամբ ամրագրված և միջազգային պայմանագրերով ստանձնած պարտավորությունների լիարժեք կատարում»:
ՄԱԿ-ի մշտական համակարգող Բրեդլի Բուզետտոն ընթերցեց Մարդու իրավունքների պաշտպանության ազգային ռազմավարությունից բխող միջոցառումների ծրագրի մեկնարկի վերաբերյալ համատեղ հայտարարությունը ու շեշտեց, որ ծրագիրը կենդանի փաստաթուղթ է, որը կարող է ենթարկվել վերանայումների` առավել դինամիկ քայլեր ձեռնարկելու`բազմակարծության, մարդու իրավունքների պաշտպանության ոլորտում: Ըստ Բուզետտոնի` ծրագիրը կարևորագույն հնարավորություն է հաշվետվողականություն ցուցադրելու համար:
ՀՀ արդարադատության նախարար Հովհաննես Մանուկյանը նշեց, որ ծրագիրը ներառում է միջոցառումների մեծ շարք օրենքների ընդունման հարցում ճիշտ ու արդյունավետ պայմանների ստեղծմանն ուղղված գործողությունների իրականացման համար: Նախարարը ծրագիրն արդիական համարեց հատկապես սահմանադրական փոփոխությունների և առաջիկայում իրականացվելիք պետաիրավական բարեփոխումների համատեքստում:
Կարդացեք նաև
Aravot.am-ը իրավապաշտպան Արտակ Զեյնալյանից հետաքրքրվեց` այսպիսի փաստաթղթերն ի զորո՞ւ են քաղաքացու արժանապատվությունը պաշտպանել օրինակ` ոստիկանության գործողություններից, որոնց ականատեսը եղանք հունիսի 23-ին ` ՀՀ հանրային ծառայությունները կարգավորող հանձնաժողովի շենքի տարածքում ընդդեմ էլեկտրաէներգիայի սակագնի թանկացման բողոքի ակցիայի ժամանակ, պարոն Զեյնալյանը պատասխանեց. «Պետական պաշտոնատար անձինք, որ խոսում էին, մեխանիկորեն բառեր էին արտահայտում, առանց հասկանալու դրանց բովանդակությունը և զգալու`ինչ են արտասանում: Այդ մարդիկ մարդու իրավունքներ պաշտպանող չեն, չեն հասկանում մարդու կարևորությունը, չեն հասկանում, որ պետականության կրողը ՀՀ քաղաքացիներն են: Սրանք վերամբարձ խոսքեր կամ կենաց չէ, այլ սա հռչակագրի դրույթ է: Մի քանի օր առաջ նախագահը հանձնարարություն է տվել արդարադատության նախարարին ոստիկանության հետ քննարկել ինչ-որ փոփոխություններ.սրանք կապ չունեն ժողովրդի հետ, դրանք յուրային իշխանություն չեն, իսկ ինքնիշխանության հատկություններից մեկը յուրային իշխանություն ունենալն է»:
Հետաքրքրվեցինք` այդ դեպքում մարդու իրավունքների և արժանապատվության պաշտպանության մեխանիզմը ո՞րն է, պարոն Զեյնալյանը պատասխանեց. «Ժողովուրդը պիտի իրացնի իր ինքնիշխանությունը»:
Արտակ Զեյնալյանից հետաքրքրվեցինք` արդյոք համամի՞տ է ՀՀ ոստիկանապետ Վլադիմիր Գասպարյանի այն կարծիքին, թե Սարյան փողոցում ոստիկանությունը ճիշտ է վարվել, Արտակ Զեյնալյանը պատասխանեց. «Շարքային ոստիկանները ճիշտ չեն վարվել, ոստիկանապետը ճիշտ չի վարվել, իրենք անհիմն են»:
Տաթև ՀԱՐՈՒԹՅՈՒՆՅԱՆ
