«Ով չի կարողանում աշխատել, նրան պետք է ազատել, թե չէ ի՞նչ է, գնում են, ձախողում են, իմաստունի տեղ են դնում իրենց ու գալիս»:
«Ալիևը վիրավորում է մեր ամբողջ ժողովրդին, այստեղ պարտիզանի նման լռելը ես սխալ եմ համարում»,-այսօր «Հայելի» մամուլի ակումբում, խոսելով Եվրոպայի խորհրդի խորհրդարանական վեհաժողովի ամառային նստաշրջանում զարգացող իրադարձությունների մասին, ասաց ՀՀ ԱԳ նախկին փոխնախարար, ՀՀ արտակարգ և լիազոր դեսպան Արման Նավասարդյանը (լուսանկարում՝ձախից): Խոսքը, մասնավորաբար, վերաբերվում էր Ադրբեջանի նախագահի ելույթից հետո ԵԽԽՎ-ում հայկական պատվիրակության լռությանը: Նավասարդանի խոսքով՝ չպիտի մոռանալ, որ դա խորհրդրանական դիվանագիտություն իրականացնելու հարթակ է, եւ ԵԽԽՎ-ում ներկայացվող պատվիրակությունը պետք է օժտված լինի դիվանագիտական գործունեությամբ ու նպաստի ՀՀ-ի դիվանագիտական ուղուն. «Պատիվ չէ այդպես նստել ու ականջները կախել»:
Ասուլիսի մյուս բանախոս քաղաքագետ Լևոն Շիրինյանն ընդգծեց, որ Ադրբեջանը մեր դեմ վարում է տոտալ պատերազմ՝ կրակում է սահմանամերձ գոտում, մշակույթի ոլորտում, մեր հայրենիքի հողերն է նվաճում. «Մեր պատասխանը պետք է լինի տոտալ հակահարձակում՝ սահմանամերձ գոտում նույնիսկ դիպուկահարի զենքով ոչնչացնելուց սկսած մինչեւ բոլոր տեղերում ելույթներով»: Քաղաքագետը կարծում է, որ հայկական պատվիրակությունը պատասխան չի ունեցել տալու, ու նման իրավիճակներից խուսափելու համար պետք է, որ պատվիրակության անդամները լինեն կիրթ, դաստիարակված ու ներքին ինտրիգներից հեռու մարդիկ: Լրագրողներից մեկի հարցին` միգուցե Հայաստանի ղեկավարությո՞ւնն էր հրահանգել լռել, Շիրինյանն արձագանքեց. «Եթե հրահանգ կար, թող խախտեին հրահանգը, թող խախտեր, թող այստեղ հեռացնեին իրենց: Անցյալ անգամ Զարուհին ասեց չէ՞, դե ուրեմն Զարուհուն հետ կանչեք»:
Լրագրողների մեկ այլ դիտարկմանը, որ հայաստանյան պատվիրակության կազմում են նաև ընդդիմադիր պատգամավորներ, Արման Նավասարդյանը պատասխանեց. «Երբ պետք է քննադատել այստեղ Հայաստանում նույն ղեկավարությանը, անում են, բայց գնալ Ստրասբուրգ հասնել հարկատուների հաշվին ու նորահարսի նման նստել ու ոչինչ չասել, ես ճիշտ չեմ համարում»: Լեւոն Շիրինյանն էլ կարծիք հայտնեց, որ պետք է պատիժների մեխանիզմ ստեղծել. «Ով չի կարողանում աշխատել, նրան պետք է ազատել, թե չէ ի՞նչ է, գնում են, ձախողում են, իմաստունի տեղ են դնում իրենց ու գալիս»:
Կարդացեք նաև
Նելլի ԳՐԻԳՈՐՅԱՆ
