Ազգությամբ եզդի Վլադիմիր Սիաբանդովին մեղադրանք է առաջադրվել այն բանի համար, որ նա «Ռիչի» բարի մուտքի մոտ վիճաբանել է Քյարամ Ավդոյանի հետ և դիտավորությամբ ծանր վնասվածք պատճառել: Քյարամ Ավդոյանը մահացել է:
Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարան չէր ներկայացել կարեւորագույն վկաներից մեկը՝ Արսեն Մարտիրոսյանը:
Նա աշխատել է տվյալ բարում:
Տուժողի ներկայացուցիչները ասացին, որ կարեւոր է Ռոման Մամոյանի գալը, նաեւ դիմեցին դատարանին, որպեսզի միջոցներ ձեռք առնեն վկային բերման ենթարկելու համար:
Ասվեց, որ մարտից սկսվել է դատական նիստերը, սակայն նա չի ներկայանում: Ըստ տուժողի ներկայացուցիչներից մեկի` վկան ցանկանում է լքել Հայաստանը, մեկնել Ֆրանսիա:
Դատավոր Գագիկ Պողոսյանն ասաց, որ վկայի նկատմամբ բերման որոշում դատարանը մեկ անգամ արդեն իսկ կայացրել է:
Կարդացեք նաև
Հրապարակվեց վկայի նախաքննության ժամանակ տրված ցուցմունքը:
Համաձայն դրա, դեպքի օրը իրենց բար են եկել երկու անձ, որոնք պատվիրել են մեկ շիշ կոնյակ եւ «Ռաֆայելո» շոկոլադ: Նրանց հետ կապված որեւէ արտառոց բան չի տեսել վկան:Նրանցից մեկը մոտեցել է իրեն, հարցրել, թե 5000 դրամ գումարը բավարա՞ր է վճարելու համար:
Վկան ասել է, որ գումարը բավարար չէ, քանի որ այն կազմել է 10 հազար դրամից ավել:
Նա ասել է, դուրս կգա, եւ կմոտենա:Քիչ հետո վկան տեսել էր, որ դարակի վրա հաճախորդը թողել է «Նոկիա» տիպի հեռախոսը:Նա կարծել է, թե հեռախոսը հաճախորդը թողել է, որպես երաշխիք պակասորդ գումարը բերելու համար:Փակել է բարը ու գնացել:Հրապարակման կեսից վկայի հայրը դատարանին ներկայացրեց մի տեղեկանք որդու բացակայելու վերաբերյալ:
Մեղադրողը հրապարակեց նաեւ նրա եւ անմեղսունակ ճանաչված Վլադիմիր Սիաբանդովի հետ արեւերես հարցաքննության արձանագրությունը, Սիաբանդովի եւ հանգուցյալի դատաբժշկական փորձաքննության արձանագրությունները, նաեւ՝ դատահետքաբանական, դատակենսաբանական փորձաքննության, դեպքի վայրի զննության արձանագրությունները, այլ ապացույցներ եւս:
Դատական նիստին մասնակցում են հանգուցյալի սեւազգեստ հարազատները:
Սիաբանդովն ընդհանրապես բառ չի ասում, չի նայում որեւէ մեկին, գլուխը կախ է:
Ռուզան ՄԻՆԱՍՅԱՆ
