«Զվարթնոց» պատմամշակութային արգելոց-թանգարանի մասնաճյուղի վարիչ Վարդան Գրիգորյանը մշակույթի նախարար Հասմիկ Պողոսյանի որոշումը՝ իրեն աշխատանքից ազատելու մասին համարում է ճիշտ ու տեղին:
Հիշեցնենք, որ պարոն Գրիգորյանը աշխատանքից ազատվեց տաճարի տարածքում վերջերս տեղի ունեցած կերուխումից հետո, ինչը մեծ աղմուկ էր բարձրացրել:
«Որոշ կետեր չեմ կատարել, աշխատանքից հեռացրել է: Սխալ եմ եղել, նախարարը մոտեցում է ցույց տվել, ընդունում եմ»,- Aravot.am-ի հետ զրույցում իրեն աշխատանքից ազատելու որոշման մասին այսպես արտահայտվեց «Զվարթնոց» թանգարանի արդեն նախկին վարիչը:
Մեր հարցին, թե ի՞նչ կետեր եք խախտել, պարոն Գրիգորյանը պատմեց, որ կերուխումի ժամանակ տարածքում շորտիկով իրենց աշխատակիցներն են աշխատել. «Ուղղակի աշխատողներ են շորտիկներով երեւացել, որ պետք է չերեւային, բայց դե ես ի վիճակի չեմ բոլորին կարգի բերել, իմ գործը հուշարձան պահպանելն է: Ճիշտ է դրանց շպրտել եմ դուրս, բայց դե մարդ են էլի շոգ է, զբոսաշրջիկներն էլ են շորտիկով գալիս»:
Կարդացեք նաև
Մեր հարցին, թե տարածքը վարձակալած կերուխումի կազմակերպիչնե՞րն են նախարարին դժգոհել շորտիկով աշխատակիցներից, նախկին վարիչը չցանկացավ պատմել, միայն ասաց. «Ոչ ոք չի տեսել շորտիկով աշխատակիցներին, ուղղակի նկարել են, կադրում երեւացել է ու իրենց դուր չի եկել»:
Մեր հարցին՝ ում դուր չի եկել, ասաց՝«ինձ» ու պնդեց, որ չի ցանկանում այլեւս խոսել:
Նրանից հետաքրքրվեցինք նաեւ, թե կերուխումից մասնակիցները հուշարձանը չե՞ն վնասել, պարոն Գրիգորյանն ասաց՝ առանձնապես չէ ու էլի պնդեց, որ իրեն հարմար չէ խոսել ու հավելեց, որ պետք է ուշադիր լիներ, որ տաճարի որոշ հատվածներ չցուցադրվեր, օրինակ՝ Զվարթնոցի պատկերը: Ըստ նրա, հյուրերը շրջել են ու 3D –ով դիտել Զվարթնոցի ավերակները:
Մեր հարցին, իսկ 700.000 դրամով կարելի՞ է պատմամշակութային արժեք համարվող հուշարձանը հանձնել կերուխումի, նա ասաց.«Գինը վերեւում են մուծում, գալիս են, մենք կապ չունենք, բայց շատ էժան է, ավելի թանկ պետք է լինի, որ որոշ չափով հուշարձանին նպաստի, ոռոգման համակարգ չկա, ցանկապատ չկա, ահռելի մեծ աշխատանքներ կան անելու»:
Հիշեցնենք, որ մշակույթի նախարարությունը տաճարի տարածքում անցկացված կերուխումից հետո հաղորդագրություն տարածեց՝ տեղեկացնելով՝ հաշվի առնելով, որ «Զվարթնոց» պատմամշակութային արգելոց-թանգարանի տարածքում կազմակերպված միջոցառումների ընթացքում պատշաճ չեն վերահսկվել պայմանագրերում կնքված կետերը՝ ՀՀ մշակույթի նախարար Հասմիկ Պողոսյանի հրամանով «Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի տնօրեն Վ. Պողոսյանին հայտարարվել է խիստ նկատողություն:
«Զվարթնոց» պատմամշակութային արգելոց-թանգարանի մասնաճյուղի վարիչ Վ. Գրիգորյանը ազատվել է զբաղեցրած պաշտոնից:
Արփինե ՍԻՄՈՆՅԱՆ
