Այսօր հունիսի` 23-ին, մի խումբ քաղաքացիներ հավաքվել էին Հայաստանի Հանրապետության հանրային ծառայությունները կարգավորող հանձնաժողովի շենքի դիմաց: Նրանք հայտարարեցին, որ անօրինական են համարում օգոստոսի 1-ից էլեկտրաէներգիայի սակագնի բարձրացման հանգամանքը եւ ցանկություն հայտնեցին տեսնել հանձնաժողովի անդամներից մեկին, ով կկարողանար լսել իրենց եւ պատասխանել իրենց հարցերին:
Սակայն ոստիկանությունը շղթա կազմեց եւ ոչ միայն քաղաքացիական ակտիվիստներին թույլ չտվեց վերեւ բարձրանալ, այլեւ տեղանքի բնակիչներին: Ակտիվիստները սկզբում ոստիկաններից պահանջեցին ներկայացնել իրավական հիմքերը, այլապես բացել ճանապարհը, սակայն ոստիկանները սկսեցին հրել ակտիվիստներին: Սակայն էլեկտրաէներգիայի թանկացման դեմ պայքարողների մի խումբ կարողացավ ճեղքել ոստիկանների շղթան:
Ոստիկանները բերման ենթարկեցին այդ ակտիվիստներից երկուսին՝ պատճառաբանելով, որ նրանք ոստիկանի իրավական պահանջը չեն կատարել: Ի պատասխան ոստիկանների՝ ակտիվիստները կանգնեցին ոստիկանության մեքենայի դիմաց, որպեսզի չկարողանան տանել իրենց ընկերներին: Եվ չնայած այն փաստին, որ ոստիկաններն ուժ կիրառելով փորձում էին ազատել մեքենայի դիմացը, ակտիվիստները շարունակեցին մնալ իրենց տեղերում:
Ակտիվիստները, կանգնած մնալով ոստիկանության մեքենայի դիմաց, շարունակում էին պահանջել բաց թողնել իրենց համախոհներին եւ ներկայացնել նրանց բերման ենթարկելու իրավական հիմքերը, սակայն տեսնելով, որ իրենց պահանջները չեն իրականանում նրանք նստեցին ավտոմեքենայի դիմաց: Սակայն ոստիկանները սկսեցին հրել ակտիվիստներին՝ հավասարապես թե՛ կանանց եւ թե՛ տղամարդկանց եւ այդպես էլ ազատեցին ոստիկանության մեքենայի ճանապարհը:
Կարդացեք նաև
Ակտիվիստները շտապեցին դեպի Սարյան փողոց, որտեղ էլ նստեցին: Ոստիկանները այս անգամ ակտիվիստներից ոմանց՝ ձեռքերից եւ ոտքերից բռնելով բերման ենթարկեցին, տեսնելով դա, ակտիվիստներից ոմանք պառկեցին ասֆալտին: Բերման է ենթարկվել քսանից ավելի ակտիվիստ:
Ամի ՉԻՉԱԿՅԱՆ
