«Ղարաբաղյան հակամարտության կարգավորման բազա գոյություն ունի, նկատի ունեմ համանախագահող երկրների` Ֆրանսիայի, Ռուսաստանի և ԱՄՆ նախագահների հայտարարություններում վերջին 4-5 տարիներին հնչեցրած սկզբունքները: Խնդիրն այդ սկզբունքները փաստացի իրագործելն է»,-այսօր լրագրողների հետ հանդիպմանը Երևանում հայտարարեց ՌԴ ԱԳ նախարար Սերգեյ Լավրովը:
ՌԴ ԱԳ նախարարը շեշտեց հակամարտության կարգավորման հարցում հետևողականության ցուցաբերման անհրաժեշտությունն ու ասաց, որ Ռուսաստանը, լինելով համանախագահող երկիր, ամեն ինչ անելու է, որպեսզի Ադրբեջանի և ՀՀ նախագահների միջև անցյալ տարի ծագած ուղղակի երկխոսությունը լինի շարունակական:
Նշենք, որ ՀՀ ԱԳ նախարարությունում ՀՀ և ՌԴ ԱԳ նախարարներ Էդվարդ Նալբանդյանի և Սերգեյ Լավրովի մամուլի ասուլիսը սկսվեց 40 րոպե ուշացումով և տևեց ընդամենը 15 րոպե: Այն անցկացվեց ռուսերենով` առանց հայերեն թարգմանության, ինչը, ըստ էության ՀՀ «Լեզվի մասին» օրենքի խախտում է: Օրինակ` «Լեզվի մասին» օրենքում հոդված 4-ի «բ» կետով սահմանված է. «Համագումարներում, նստաշրջաններում, ժողովներում, գիտաժողովներում, հրապարակային ատենախոսությունների եւ պաշտոնական ու զանգվածային այլ միջոցառումների ժամանակ ապահովել ոչ հայերեն ելույթների զուգահեռ հայերեն թարգմանությունը»:
Ասուլիսին հարցեր տալու հնարավորություն ունեցավ երեք լրագրող` երկուսը ռուսական, մեկը հայկական ԶԼՄ-ից:
Կարդացեք նաև
Էդվարդ Նալբանդյանը ընդգծեց, որ Ռուսաստանը Հայաստանի տնտեսական կարևորագույն գործընկերն է, 2013-ին երկու երկրների միջև ապրանքաշրջանառությունը աճել է 10-ից ավելի տոկոսով` կազմելով 1 միլիարդ 445 միլիոն դոլար: ԱԳ նախարարի հավաստմամբ` ՌԴ-ն ՀՀ-ի տնտեսության մեջ կարևորագույն ներդրողն է:
Նախարարը նշեց, որ Սերգեյ Լավրովի հետ քննարկել են ՌԴ միգրացիոն օրենսդրությունում կատարված փոփոխություններին վերաբերող հարցեր, ԼՂ հակամարտության կարգավորման, Ուկրաինայում, Իրաքում, Սիրիայում գոյություն ունեցող իրավիճակն ու այլ հարցեր:
Սերգեյ Լավրովը շեշտեց. «Մեր հարաբերությունները Հայաստանի հետ գործընկերային, ռազմավարական դաշնակցի հարաբերություններ են, դրանք հինվում են բարեկամության և փոխօգնության վրա»:
Նա նաև ընդգծեց, որ Ռուսաստանը շահագրգռված է ԼՂ հակամարտության խաղաղ կարգավորմամբ: ՌԴ ԱԳ նախարարը բարձր գնահատեց երկու երկրների միջև ռազմատեխնիկական, տնտեսական, միջխորհրդարանական հարաբերությունները, ասաց, որ հուլիսի սկզբին ՌԴ-ում սպասում են ՀՀ ԱԺ նախագահին:
Տաթև ՀԱՐՈՒԹՅՈՒՆՅԱՆ
Էդուարդ Նալբանդյանի պես թույ՛լ ԱԳՆ հայոց պատմության մեջ չի եղել:
Մի ազգ, որն իր լեզուն չի հարգում:
Բայց Էդ նալդանդյանը նախարար ա ու էն էլ հա՞յ: Ինչո՞վ ա հայ ու ինչո՞վ ա նախարար: Ինքն ո՜ւր, հայ դիվանագիտության խնդիրներն ո՜ւր: Տեսնես որ մրցի Արմեն Աշոտյանի հետ, ո՞ր մեկը կհաղթի: