ԱԺ պետաիրավական հարցերի հանձնաժողովի նախագահ Հովհաննես Սահակյանը` Մաքսային միությանն անդամակցության գործընթացի մասին
– Աստանայում Եվրասիական տնտեսական միության հիմնադիր համաժողովում ՀՀ նախագահ Սերժ Սարգսյանը ժամանակ խնդրեց, որպեսզի Հայաստանը կարգավորի որոշ «տեխնիկական» հարցեր եւ հունիսի 15-ին արդեն ստորագրի ԵՏՄ անդամության, ապա հուլիսի մեկին` Մաքսային միությանն անդամության փաստաթղթերը: Առաջին ժամկետը լրացավ, մյուսը մոտենում է: Տեխնիկական խնդիրները հաղթահարվա՞ծ են:
– Կառավարությունում ստեղծվել է մասնագիտական աշխատանքային խումբ, որը զբաղվում է այդ հարցերով, որպեսզի կարողանան այն հարցերը, որոնք դեռ հստակեցված չեն, հստակեցվեն: Անցումային ժամանակաշրջանում, փաստաթղթերը ստորագրելուց հետո, որպեսզի թե մեր տնտեսության, թե գործարար աշխարհի վրա անցումն ավելի մեղմ ազդեցություն ունենա: Եվ` հօգուտ մեզ լինի: Այսինքն՝ անցումը դրական անդրադարձներ ունենա:
Եվ, իհարկե, եթե մի բան պայմանավորվել են, եւ մինչ օրս այլ հայտարարություն չի հնչել, մենք կարող ենք ենթադրել, որ փաստաթուղթը կստորագրվի:
Կարդացեք նաև
– Ենթադրվում է նաեւ, որ մի շարք օրենսդրական փոփոխություններ էլ պետք է արվեն. իբրեւ ՀՀ ԱԺ պետաիրավական հարցերի հանձնաժողովի նախագահ՝ կարո՞ղ եք ասել` իրավապայմանագրային բազան արդեն կա՞ այդ փաստաթղթերի ստորագրման համար:
– Չեմ կարծում, թե կան գլոբալ օրենքներ, որոնք պետք է արմատապես հարմարեցվեն, բայց կան մի շարք օրենքներ, որոնցից մեկն էլ ընթացող արտահերթ նստաշրջանի օրակարգում է՝ սննդամթերքի անվտանգության մասին նախագիծը: Տարբեր նմանատիպ մի շարք նախագծեր կան, որոնք ընդհանուր մաքսային տարածքում պետք է ընդհանրական լինեն:
Մենք հիմա անցումային ժամանակահատվածում ենք: Կարծում եմ՝ փաստաթուղթը ստորագրելուց հետո մենք կունենանք որոշակի ժամանակահատված, որպեսզի աստիճանաբար կարողանանք Եվրասիական միության լիարժեք անդամ դառնալ: Այնպես չէ, որ առաջին իսկ օրը պետք է սկսենք: Չմոռանանք, որ մինչեւ հունվարի մեկը մենք ժամանակ ունենք: Իհարկե, կան մի քանի տասնյակ օրենքներ, նախագծեր, իրավական ակտեր, որոնք ընդհանուր առմամբ պետք է համաձայնեցվեն մաքսային օրենսդրության հետ, բայց այնպես չէ, որ մինչեւ հուլիսի մեկը մենք պետք է դա անենք ու նոր ստորագրենք: Մենք հիմա գլոբալ առումով հստակեցնում, համաձայնեցնում ենք մոտեցումները եւ տեսակետները, այնուհետեւ փորձելու ենք տալ նաեւ իրավական լուծումներ:
Հուլիսի մեկին ստորագրելով` մենք ընդունում ենք ընդհանուր սկզբունքները, այնուհետեւ՝ մինչեւ հունվարի մեկը, երբ գործողության մեջ կմտնի մեր ստորագրած միջպետական համաձայնագիրը, մենք փորձելու ենք ձեր նշած փոփոխություններն անել: Դա գործընթաց է, որում նաեւ ՍԴ-ն պետք է ներառվի, քանզի եթե որեւէ միջազգային պայմանագիր հակասում է մեր Սահմանադրությանը, ապա նման պայմանագրերը չեն ստորագրվում: ԱԺ-ն վավերացնում է փաստաթուղթը` ՍԴ-ի եզրակացությունը հիմք ընդունելով:
– «Ժառանգություն» խմբակցության պատգամավոր Ալեքսանդր Արզումանյանն օրերս «Առավոտի» հետ զրույցում նկատել էր, որ ՄՄ-ին անդամակցության գործընթացը բավական քողարկված է, եւ օրենսդիր մարմինը ներգրավված չէ դրանում: Չկա՞ նման մտավախության հիմք:
– Պարոն Արզումանյանի պես փորձառու դիվանագետը պետք է իմանա, որ նախնական գործընթացը հասու է այնքանով, որքանով կողմերը նպատակահարմար են գտնում: Այսինքն՝ բանակցություններում սկզբունքորեն կարող է լինել նաեւ գաղտնի ժամանակահատված: Բայց երբ հարցը գա խորհրդարան` քննարկման եւ հաստատման, որեւէ գաղտնի բան չի լինի:
– Իբրեւ ԱԺ պետաիրավական հարցերի հանձնաժողովի նախագահ եւ կարկառուն ՀՀԿ-ական՝ տեղյա՞կ եք աշխատանքային խմբի ծավալած գործունեությունից, ընդհանրապես՝ ՄՄ-ին անդամակցության գործընթացից:
– ՀՀ Սահմանադրությամբ կառավարությունն ու օրենսդիր մարմինն ունեն իրենց վերապահված լիազորությունները: Ես տեղեկատվությանը տիրապետում եմ եւ իրազեկված եմ այնքանով, որքանով առնչվում է իմ զբաղեցրած պաշտոնին եւ ՀՀԿ-ում ունեցած իմ դիրքին համապատասխան: Հետեւաբար, եթե կառավարությունն է զբաղվում այդ խնդրով, ապա կառավարության աշխատանքային խումբն էլ քննարկում, համաձայնեցնում է բոլոր հարցերը, գալիս է ընդհանուր եզրակացության` պատրաստելով ստորագրման: Դրանից հետո միայն մեր խորհրդարանական լիազորությունների շրջանակներում մեր հանձնաժողովը քննարկումներ, լսումներ եւ այլ միջոցառումներ է կազմակերպում:
– Նմանատիպ մի գործընթաց ընթանում էր ԵՄ-ի հետ Ասոցացման պայմանագիրը ստորագրելուց առաջ, վերջում պարզվեց, որ ոչ ոք ոչնչից տեղյակ չէ:
– Համաձայն չեմ, որովհետեւ ԵՄ Ասոցացման պայմանագրի հետ կապված ԱԺ-ն ստեղծել էր արեւելյան գործընկերության միջխորհրդարանական խումբ, որի անդամ էին պատգամավորներ բոլոր խմբակցություններից, եւ բոլորն էլ այս կամ այն կերպ տեղեկացված էին գործընթացից: Իհարկե՝ այնքանով, որքանով թույլատրելի էր: Եվ եթե «եվրասիականով» էլ ստեղծվի միջպառլամենտական աշխատանքային խումբ կամ համագործակցության որեւիցե ֆորմատ, պառլամենտը կմասնակցի այդ գործընթացներին:
Զրույցը` ՆԵԼԼԻ ԳՐԻԳՈՐՅԱՆԻ
«Առավոտ» օրաթերթ
21.06.2014
