Այս համեղ եւ տպավորիչ նախուտեստը շատ լավ համադրություն է ինչպես գինու, այնպես էլ գարեջրի եւ նույնիսկ՝ օղու համար: Որպեսզի հաջող ստացվի, պետք է վերցնել բրինզա տեսակի սպիտակ պանիր, կարելի է մեր հայկական ոչխարի պանիրը կամ չանախն էլ փորձել, պետք է որ դրանցով էլ լավ ստացվի:
Անհրաժեշտ մթերքները
Սպիտակ, պինդ պանիր, ցանկալի է՝ բրինզա- 400 գրամ
Սոխ- 2 գլուխ
Սխտոր- 5 պճեղ
Սպիտակ գինի- 100 գրամ
Սպիտակ քացախ, ցանկալի է՝ խաղողի, եթե չկա՝ խնձորի- 2 ճաշի գդալ
Բուսական (ցանկալի է ձիթապտղի) յուղ
Հազրեվարդ (ռոզմարին)- եթե թարմը գտնեք՝ 2 ճյուղ, եթե ոչ՝ 1 ճաշի գդալ չորացրած
Սեւ (կամ գույնզգույն) հատիկավոր պղպեղ
Կարդացեք նաև
Պատրաստման եղանակը
Պանիրը կտրատեք խորանարդիկներով: Սոխը՝ օղակներով, սխտորը՝ երկայնքով՝ բարակ-բարակ: Պղպեղները ջարդեք, բայց մի աղացեք: Կարող եք թեթեւակի հարվածել ծանր բաժակով կամ ապակե տարայով:
Սկսեք հավաքել:
Ապակե մեկ լիտրանոց բանկայի մեջ սկսեք շերտերով շարել պանիրը, վրան սոխը, սխտորը, թարմ կամ չորացրած հազրեվարդը, պղպեղները, հաջորդ շերտը՝ կրկին պանիր, ապա սոխ, սխտոր, համեմունքներ: Շարեք՝ մինչեւ լցնեք տարան, բայց մի սեղմեք պանիրն ու սոխ-սխտորը:
Սպիտակ գինու վրա ավելացրեք քացախը, լցրեք պանրի վրա: Ինչքան որ տեղ մնա՝ ավելացրեք ձեթը: Պետք է ամբողջությամբ ծածկվի: Հավանաբար 250 գրամի չափ բուսական յուղի կարիք կլինի:
Ամուր փակեք կափարիչով եւ դրեք սառնարանը 10-14 օր: Ավելի վաղ միտք չունի բացելը, որովհետեւ դեռ լրիվ հասունացած չի լինի:
Այս նախուտեստը համեղ է նաեւ լոլիկի եւ ձիթապտղի հետ խառնած՝ որպես աղցան: Կամ պարզապես սեւ հացով՝ որպես թեթեւ հետճաշիկ:
Բարի ախորժակ:
