ԱԺ-ում ՀՀԿ-ն իրար հետեւից քննարկեց մի շարք օրենքների նախագծեր: Շատ օրինագծերի հետ կապված որեւէ հարց, մտքերի փոխանակություն չեղավ, որովհետեւ ոչ իշխանական ուժերը, որոնք ցուցադրաբար լքել էին նիստերի դահլիճը, ընդմիջումից հետո էլ չվերադարձան: Պարզապես 10 րոպեի ընթացքում քննարկվում եւ ավարտվում էր միանգամից 3-4 օրենք:
Փոքրամասնության պահվածքին անդրադարձավ ՀՀԿ պատգամավոր Հովհաննես Սահակյանը. «Ինձ մոտ տպավորություն էր, որ մեր գործընկերները, որեւէ լուրջ փաստարկ չունենալով, քննարկման պատրաստ չլինելով՝ փորձեցին ԱԺ նիստերի բնականոն ընթացքը խաթարել: Մեծամասնությունը նրա համար է, որպեսզի թույլ չտա որեւէ մեկը խաթարի նիստերի բնականոն ընթացքը: Պատճառաբանությունն այն էր, որ 20 րոպե վերցրեցին, չտվեցինք: Բարեկամներ, այս հարցերը, որոնք քննարկվում են, երեւի 6 ամսից ավելի քննարկում ենք Կուտակայինի հետ կապված, նո՞ր պետք է որոշեք ինչ եք անելու, կամ ձեր դիրքորոշումն իմանաք: Պատճառաբանելով, որ սահմանափակեցին մեր իրավունքները, սրանով երկար որեւէ տեղ չեք հասնի: Փոքրամասնությունը պետք է ներկայացնի իր տեսակետը, քննարկումների արդյունքում ձեւավորվի ընդհանուր մոտեցումը՝ տարբեր հարցերի շուրջ»:
Նա գործընկերներին կոչ արեց կառուցողական դաշտում գործել. «Մենք ունենք այն քաղաքական մեծամասնությունը, որ կարող ենք ապահովել ե՛ւ ցանկացած հարցի որակյալ քննարկումը, ե՛ւ կարող ենք ապահովել ԱԺ նիստի բնականոն ընթացքը»:
Հովհաննես Սահակյանի հետ համաձայնեց ԱԺ փոխխոսնակ Հերմինե Նաղդալյանը. «Ուզում եմ միանալ ձեր ասածներին, որ քաղաքական մեծամասնությունը շատ կարեւոր աշխատանք է կատարել, կառավարությունն էլ իր առջեւ դրված բոլոր խնդիրների, հարցերի լուծումն է տվել: Օրենսդիր մարմնում աշխատող թիմը ապահովել է կառավարության այդ առաջարկի ընդունումը, քննարկումը: Ընդդիմության գործընկերները որեւէ արգումենտ չունեն, պարզապես կիրառեցին այդ հնարքը՝ խորհրդարանի աշխատանքները խաթարելու ուղղությամբ»:
Կարդացեք նաև
Հռիփսիմե ՋԵԲԵՋՅԱՆ
