Այսօր ԱԺ-ում Կուտակային կենսաթոշակային օրենքի քննարկման ժամանակ ՀՅԴ պատգամավոր Աղվան Վարդանյանը հիշեցրեց Հովիկ Աբրահամյանի խոսքերը, որոնք ասել էր՝ Նաիրա Զոհրաբյանի հարցին ի պատասխան. «Կառավարության ծրագրի ներկայացման ժամանակ Նաիրա Զոհրաբյանը հարց տվեց, նորանշանակ ՀՀ վարչապետ Հովիկ Աբրահամյանը պատասխանեց, որ նոր օրենքը լինելու է պարտադիր, բայց ոչ պարտադրված: Ժողովուրդը մեր թշնամին չէ: Մենք ամեն ինչ անելու ենք, որպեսզի նոր օրենքը բխի բոլորի շահերից: Շահագրգիռ քննարկումներ ենք կազմակերպելու հասարակության ներկայացուցիչների, քաղաքական ուժերի հետ: Մենք առաջարկել ենք քաղաքական ուժերին մասնակցել աշխատանքային խմբի աշխատանքներին: Կենսաթոշակային բարեփոխումներն անհրաժեշտություն են մեզ համար եւ մենք պետք է այնպես անենք, որ նոր օրենքն ընդունելի լինի բոլորի համար: Սա Հովիկ Աբրահամյանի հայտարարությունն է, իսկ մենք ունենք այն նախագիծը, որը բերվել է խորհրդարան: Ակնհայտ է, որ այս խոստումը չի կատարվել»:
Ինչ վերաբերում է աշխատանքային խմբում ընդգրկվելուն, Աղվան Վարդանյանի ներկայացմամբ՝ «Մենք, որպես կառուցողական, պատասխանատու քաղաքական ուժ, 4 մարդ ենք առաջարկել կառավարությանը՝ Արծվիկ Մինասյանի, Արսեն Համբարձումյանի, Արա Նռանյանի թեկնածությունը: Անցել է մի ամիս, մի օր զանգում են եւ կանչում են քննարկման: Գնում են կառավարություն եւ ասում են՝ սա է մեր մշակումը, քննարկենք: Ասում ենք՝ սա քննարկում չի, սա նույն բանն է՝ ուրիշ անունով, ասում եք՝ սա է ու վերջ: Ընդունելի՞ է սա: Նման մեթոդով աշխատելը, բնականաբար, հույս չի ներշնչում: Մանիպուլյացիա անելով կամ այլ բան ասելով, այլ բան անելով ՝ սա մենք միշտ էլ տեսել ենք»:
Անդրադառնալով օրենքին՝ Աղվան Վարդանյանը նշեց, որ ակնհայտորեն խտրականության տարր կա. «Հասկանում եք, որ եթե համակարգը մնա 50 հազար հոգու վրա, այդ համակարգը չի աշխատի, դուք այդ խոստումները չեք տվել կառավարիչներին: Ձեզ պետք է նվազագույնը 170-200 հազար ներգրավված մարդ, որպեսզի ֆինանսական խնդիրները լուծեք: Եվ սա դուք համարում եք բարեփոխում: Դուք հասկանո՞ւմ եք ինչ հարված եք հասցնում մեր երիտասարդությանը: Դուք հասկանո՞ւմ եք, որ շատ-շատերն ուղղակի թքելու են եւ հեռանան մեր երկրից: Ինչի՞վրա եք հենվում»:
Հռիփսիմե ՋԵԲԵՋՅԱՆ
