ԱԺ-ում գազի հանձնաժողովը (ՀՀ գազամատակարարման համակարգի գործունեությունն ուսումնասիրող ԱԺ ժամանակավոր հանձնաժողով) պատրաստել է իրենց ուսումնասիրությունն ամփոփող «միջանկյալ եզրակացություն» , որն ընդգրկված է ԱԺ արտահերթ նիստերի օրակարգում :
ԱԺ ԲՀԿ խմբակցությունը ներկայացնող պատգամավոր Միքայել Մելքումյանը, որ այդ հանձնաժողովի փոխնախագահն է, ասաց, որ ամենայն հավանականությամբ իրենց հանձնաժողովը մինչեւ տարեվերջ դեռ կաշխատի, որովհետեւ շատ հարցեր դեռ պատասխաններ չեն ստացել, ավելին՝ նոր հարցեր են առաջացել, եւ այս եզրակացությամբ ընդամենը ձեւակերպված են հանձնաժողովի մտահոգությունները: «Առավոտը» Մ. Մելքումյանից հետաքրքրվեց, թե իշխանությունը սովորաբար ասում է, որ սահմանի վրա 189 դոլարով գազի գինը 390 է հասնում միայն բնակիչների համար, իսկ խոշոր օգտագործողների, այդ թվում՝ էլէներգիա արտադրող ՋԷԿ-երի համար գազն արժե ընդամենը 270 դոլար՝ խորանարդ մետրի համար, եւ հենց դրանով է պայմանավորված, որ էլէներգիայի սակագները բարձր չեն, սակայն այժմ արդեն հենց էլէներգիայի սակագինն են ուզում բարձրացնել, ինչպե՞ս հասկանալ, պարոն Մելքումյանը պատասխանեց. «Սպասենք, սպասենք, ես հակված եմ, ավելին՝ համոզված եմ, որ չի թանկանա էլեկտրաէներգիան… Տեսնենք»:
Մելանյա ԲԱՐՍԵՂՅԱՆ
