Երեկ ԱԺ-ում էլեկտրաէներգիայի սակագնի թանկացման վերաբերյալ հրավիրված խորհրդարանական լսումների ժամանակ «Օրինաց երկիր» խմբակցության պատգամավոր Հովհաննես Մարգարյանն իր ելույթում նշեց. «Եթե հիշում եք, 2005թ. սակագները կարգավորող հանձնաժողովի մասին օրենսդրությամբ արգելված էր Հանրային ծառայությունները կարգավորող հանձնաժողովի որոշումները` կապված սակագնի թանկացման հետ, դատական կարգով բողոքարկել եւ վերանայել: Ինքս եմ բողոքը Սահմանադրական դատարանին ներկայացրել, եւ մեզ հաջողվեց հասնել նրան, որ այդ նորմը ճանաչվեց հակասահմանադրական, որից հետո հնարավորություն վերապահվեց, որպեսզի դատական կարգով բողոքարկենք եւ վերանայենք սակագները: Պետք է ասեմ, որ առաջիկայում մենք կրկին դիմելու ենք դատարան` փորձելու հասնել նրան, որ վերանայվի սակագինը»:
Մարգարյանը նաեւ նշեց. «Այստեղ հնչած հարցերի նպատակն այն է, որ մենք կարողանայինք պարզել, թե հանրային ծառայությունները կարգավորող հանձնաժողովը հիմնավոր փաստեր ունի՞ կապված կառավարման արդյունավետության հետ»,- ասաց նա՝ հավելելով, որ խոսքը Բաշխիչ ցանցեր ընկերության կառավարման արդյունավետության մասին է, քանի որ դրանից է հիմնականում կախված այն ճեղքվածքը, որն առաջանում է:
Խոսելով այն գործոնների մասին, որոնք ազդում են սակագնի որոշման վրա՝ պարոն Մարգարյանը ընդգծեց. «Ներկայացվում է, որ 1 կվ/ժ-ի ձեռք բերման գինը եղել է 16,4 դրամ, սակայն սպառողներին վաճառվել է 38 դրամ: Ես չգիտեմ՝ գոյություն ունի՞ արդյոք այսպիսի մենաշնորհային բիզնես, որ ինչ-որ բան գնես ու վերավաճառես կրկնակի գնով, իսկ հետո ասես, որ ճեղքվածք է առաջացել: Մի՞թե սա վատ կառավարման արդյունք չէ: Այս հարցում կա նաեւ գերիշխող դիրքի չարաշահում»:
Անդրադառնալով աշխատողների քանակին եւ աշխատավարձի ֆոնդին՝ պատգամավորն ասաց. «Երբ տնտեսվարողը զգում է, որ կա ճեղքվածք, նա պետք է վերանայի իր աշխատավարձերը, աշխատողների թվաքանակը, կորուստները: Հաջորդը, ինչի մասին ցանկանում եմ խոսել, շահույթն է: Այստեղ նշվեց, որ 14% շահութաբերություն կա: Թող շահույթը դարձնեն 8%, բայց սակագինը չթանկացնեն»:
Բանախոսը նաեւ հույս հայտնեց, որ գալիք տարի սակագինը չի բարձրանա, ավելին` նվազում կնկատվի:
Կարդացեք նաև
Սեփ.լր.
«Առավոտ» օրաթերթ
18.06.2014
