«Դուրս մեր գրպանից» նախաձեռնության անդամներն այսօր կառավարության շենքի դիմաց հայտարարեցին վաղը նախատեսած իրենց անհնազանդության երթի մասին: Նրանք կեսօրից Արշակունյաց պողոտայից սկսելու են երթը ու ավարտելու են Կոմիտասում:
Նախաձեռնության անդամ Արմեն Եփրեմյանն արդեն ծանոթացել է տուգանքների չափերը նվազեցնելու մասին ԱԺ ներկայացված օրենսդրական նախագծին, բայց դժգոհ է մնացել. «Մեր դիմումի հետ կապ չունի, ոչ մի խոսք չկա ծուղակային արագաչափերի, կարմիր գծերի մասին: Յուրաքանչյուր տեսախցիկ, որը դրված է, պետք է նպատակահարմար լինի, եթե դա չի նպաստում իրավախախտումների նվազեցմանը, ապա դրանք նպատակահարմար չեն, իսկ խախտումների թիվը ավելանում է»:
Նախաձեռնության անդամ Արտաշես Միսակյանն էլ շարունակեց. «Ո՞վ է որոշել, որ տուգանքի չափը 10.000 է, իրենք էլ իբր գնում են զիջումների, իջեցնում են : Դրանք ապօրինի փողային գանձումներ են… կարմիր գծերի մասին էլ չասեմ, ինչի՞ համար մենք վճարենք մեր փողերով կառուցած քաղաքում: Ես հեռախոսիս մեջ 100 դրամ չունեմ, ինչի՞ պետք է 5000 դրամ վճարեմ: Թող կարմիր գծերը կատարեն դատախազության մոտ, կառավարության շենքի մոտ, այնտեղ կանգառն ու կայանելը արգելված է, երկու շարքով կառավարության աշխատողների մեքենաները կայանել են: Թող տանեն Պուշկինի դպրոցի մոտ կարմիր գծանշաններ գծեն, գիտենք` ում երեխաներն են այնտեղ սովորում»:
Նա նաեւ պնդեց իրենց պահանջը` անհապաղ կասեցնել բոլոր տեսախցիկների գործունեությունը, համաներում մինչեւ այժմ բոլոր ապօրինի տուգանքների համար, վերացնել կարմիր գծանշումները. «Կեղեքում են մեզ: Քաղաքում ինչքան մսոտ, մեղրոտ տեղ կա տեսախցիկ են դնում, որ կեղեքեն մեզ»:
Կարդացեք նաև
Արփինե ՍԻՄՈՆՅԱՆ
