ՀՀ Կենտրոնական բանկի նախագահ Արթուր Ջավադյանն այսօր պատասխանելով լրագրողների հարցերին, թե արդյո՞ք Եվրասիական Տնտեսական Միության անդամ դառնալուց հետո Հայաստանի եւ Լեռնային Ղարաբաղի ֆինանսական համակարգերն առանձի՞ն են գործելու, թե՞ ոչ, ասաց, որ այդ հարցը դեռ չի քննարկվել, եւ ինքը այդպիսի բաժանում չի պատկերացնում:
Կենտրոնական բանկի նախագահն այսօր Հարավարեւելյան Եվրոպայի եվրոպական հիմնադրամի (EFSE) տարեկան ժողովի ժամանակ լրագրողների հետ ճեպազրույցում տեղեկացրեց, որ տնտեսական առումով դեռ հաստատված չէ թե ինչ է լինելու, քանի որ դեռ ոչ մի պայմանագիր ստորագրված չէ. «Պարզ չի նաեւ պայմանագրի ֆորմատը: Ինչ վերաբերում է տնտեսական համագործակցությանը, ապա վստահ եմ, որ Հայաստանի եւ Լեռնային Ղարաբաղի միջեւ այդ համագործակցությունը ինչպես եղել է, այդպես էլ շարունակվելու է»:
Պրն Ջավադյանը վստահեցրեց, որ Եվրասիական տնտեսական միության տարածքում Հայաստանի եւ ԼՂՀ-ի միջեւ լինելու է միասնական արժույթ եւ միասնական ֆինանսական տարածք: «Ցանկացած բանկ, ներառյալ` հայկական եւ արտասահմանյան բանկերը, հնարավորություն է ունենալու Լեռնային Ղարաբաղի Հանրապետությունում բացել իր մասնաճյուղը»:
Էլյա ՀՈՎՀԱՆՆԻՍՅԱՆ
