Երեկ՝ հունիսի 16-ին, տեղի ունեցած Մաքսային միության տեխնիկական կանոնակարգերի՝ Հայաստանում ընդօրինակմանը նվիրված միջոցառումը անցկացվում էր ռուսերենով եւ չկար զուգահեռ հայերեն թարգմանություն: Լրագրողների հարցին, թե ինչո՞ւ զուգահեռ թարգմանություն չկա, Էկոնոմիկայի փոխնախարար Գառնիկ Բադալյանն էլ պատասխանել էր, որ դա աշխատանքին չի խանգարել:
Aravot.am-ը հետաքրքրվեց «Հայազն»կուսակցության վարչության անդամ, «Դեմ ենք օտարալեզու դպրոցների վերաբացմանը»նախաձեռնության անդամ Արմեն Հովհաննիսյանից, թե ինչպե՞ս է նա գնահատում այդ երեւույթ, պարոն Հովհաննիսյանը նշեց, որ դա ցույց է տալիս, որ այդ մարդն ընդհանրապես չգիտի, թե ո՞ր երկրում է ապրում, ինչի՞ համար է ապրում, կյանքի իմաստը ո՞րն է.
«Մարդը, որն երկրի իրավական կարգից, սահմանադրական կարգից այդքան է հասկանում, այսինքն՝ այդ ոլորտում իր գիտելիքներն այդ ոլորտում այդ աստիճանի են ոչ միայն իրավունք չունի այդպիսի պաշտոն զբաղեցնել, այլ ընդհանրապես չի կարող քաղծառայող լինել: Քաղծառայող, եթե դառնում են, քննություն են հանձնում, եւ այդ քննության պահանջներից մեկն երկրի սահմանադրությունն իմանալն է, այսինքն՝ ինքը պետք է այդ սահմանադրության շրջանակներում գործեր՝ ուզում է Էներգետիկայի նախարարությունը լինի, ուզում է աղբահանության նախարարությունը լինի»:
Մեր դիտարկմանը, որ Գառնիկ Բադալյանը տեղյակ էր «Լեզվի մասին օրենքի»պահանջներից եւ լրագրողների հետ զրույցի ընթացքում հայտարարել էր, որ մասնակցել է «Լեզվի մասին օրենքի»մշակմանը, եւ նաեւ հայտարարել էր, որ հայոց լեզվի մասին օրենքը չի տուժի, եթե Հայաստանի տնտեսությունը զարգանա, պարոն Հովհաննիսյանը ասաց, որ այդպիսի մարդիկ, ովքեր տնտեսական խնդիրները կարեւորում են լեզվականից, լքում են երկիրը եւ գնում են այլերկիր, որտեղ տնտեսական նախադրյալներն ավելի խոստումնալից են.
Կարդացեք նաև
«Եթե մենք այստեղ ենք մնացել, ուրեմն՝ ոչինչ կարեւոր չկա, քան մեր նույնականությունն է, քան հայկական պետության գոյությունը: Մնացածն ընդամենը միջավայր է, գործիքներ են, եւ ես զարմանում եմ, որ այսպիսի առաջնայնություններով մարդիկ մեզ ղեկավարում են»:
Իսկ ՀՀԿ խմբակցության պատգամավոր Սամվել Նիկոյանը մեզ հետ զրույցում նշեց, որ թե՛ ԱՊՀ, թե՛ Մաքսային միության տարածքում, թե՛ Եվրասիական տնտեսական միության տարածքում աշխատանքային լեզուն ռուսերենն է, եւ ցանկացած աշխատանքային հանդիպումների, քննարկումների ժամանակ կարելի է օգտագործել ռուսաց լեզուն.
«Բայց եթե խոսքը վերաբերվում է պետական պաշտոնական հանդիպումներին, դա կարգավորում է Հայաստանի Հանրապետության օրենքներով՝ «Հայաստանի պաշտոնական լեզուն հայերենն է»: Այդ պատճառով մենք պետք է տարբերակենք աշխատանքային հանդիպումները եւ պաշտոնական հանդիպումները: Պաշտոնական հանդիպումները պետք է լինեն հայերենով»:
Ամի ՉԻՉԱԿՅԱՆ
