«Գազի հանձնաժողովում» որեւէ խնդիր չկա, միակ խնդիրը կապված է նյութի ծավալի հետ, որը պետք է ուսումնասիրվի: Այսօր այդ մասին մի քանի լրագրողների հետ զրույցում ասաց խորհրդարանական ժամանակավոր հանձնաժողովի նախագահ ՀՀԿ-ական Վարդան Այվազյանը` հանձնաժողովի հերթական նիստից հետո:
Հիշեցնենք, երեկ ՀԱԿ խմբակցության ղեկավար Լեւոն Զուրաբյանը լրագրողներին ասել էր, որ իշխանության ներկայացուցիչները ընդդիմանում են եւ չեն ցանկանում միջանկյալ զեկույց հրապարակել: Եթե քաղաքական մեծամասնությունը համառի, քառյակը սեփական զեկույցը կհրապարակի:
Վարդան Այվազյանն ասաց, որ միջանկյալ եզրակացություն չի լինելու, այլ լինելու է հաղորդում, որով ցանկանում են ժամանակավոր հանձնաժողովի գործունեության ժամկետը երկարաձգել, որովհետեւ ստացվել է մոտ 2000 էջ փաստաթուղթ, դրանք պետք է ուսումնասիրել, իսկ ուսումնասիրության ժամանակ էլ առաջանում են հարյուրավոր հարցադրումներ:
Հիշեցնենք, հանձնաժողովը պետք է ավարտեր իր աշխատանքները հինգերորդ նստաշրջանի ավարտին: «Կազմվել է հարցաշար 110 հարցով, բայց առաջ են գալիս նորանոր հարցեր: Միջանկյալ հաղորդում կներկայացնենք: Քաղաքական ուժերի հետ եկել ենք այն համաձայնության, որ հանձնաժողովը պետք է երկարացնի իր գործունեության ժամկետը մինչեւ վեցերորդ նստաշրջանի ավարտ, այսինքն` մինչև տարեվերջ»,- ասաց Վարդան Այվազյանը:
Կարդացեք նաև
Հարցին`եղած տեղեկատվության հիման վրա կարելի է ասել, որ բացահայտվում են մութ գործարքներ, Վարդան Այվազյանն ասաց, որ չի ցանկանում նախօրոք որեւէ բան ասել, սակայն նախնական հաղորդման ժամանակ կհնչեցվեն հարցադրումներ: «Հարցադրումները հավատացեք, շատ շատ են»,- ասաց նա:
Նելլի ԳՐԻԳՈՐՅԱՆ
