Հունիսի 29-ը անհայտ կորած ազատամարտիկների օրն է: Արցախյան հերոսամարտի ժամանակ ամենաշատը հենց այդ օրն են անհետ կորածներ եղել՝ 76 ազատամարտիկ:
2014 թ. հունիսի 13-ին ՀՀ պաշտպանության նախարար Սեյրան Օհանյանի նախագահությամբ տեղի է ունեցել Գերիների, պատանդների և անհայտ կորածների հարցերով միջգերատեսչական հանձնաժողովի նիստը՝ նվիրված անհայտ կորած ազատամարտիկների օրվան:
Այս մասին այսօր լրագրողների հետ հանդիպման ժամանակ ասաց «Անհայտ կորած ազատամարտիկների խորհուրդ» ՀԿ նախագահ, անհայտ կորած ազատամարտիկ Շահեն Առաքելյանի մայր Ռիմա Առաքելյանը: Նրա խոսքով՝ նիստի ընթացքում քննարկվել են հայ գերիներին ու անհայտ կորած ազատամարտիկներին վերաբերող մի շարք հարցեր, կարևորվել է հատկապես Երևանի և Բաքվի՝ Գերիների, պատանդների և անհայտ կորածների հարցերով պետական հանձնաժողովների հանդիպումը. «Մենք տարիներ շարունակ պնդում ենք, որ մեր հանձնաժողովները պիտի հանդիպեն, որպեսզի մենք կարողանանք ինչ-որ բան անել,- ասում է Ռ. Առաքելյանը,- բայց հակառակորդի կողմից քար լռություն է, միայն հայկական կողմն է այս ուղղությամբ քայլեր ձեռնարկում, բայց ոչ մի բան չի փոխվում»:
Անհայտ կորած ազատամարտիկ Վրեժ Գրիգորյանի մայրը՝ Սամարա Գրիգորյանն էլ համոզված է, որ ինչ-որ բան կփոխվի միայն այն ժամանակ, երբ Ադրբեջանում էլ ծնողները միասնական լինեն, պայքարեն ու պահանջեն վերադարձնել իրենց տղաներին. «Նրանց մակարդակն այնքան պիտի բարձրանա, որ նրանք պահանջեն՝ տվեք նրանց տղաներին, որ նրանք էլ տան մեր տղաներին,- ասում է Ս. Գրիգորյանը,- չէ՞ որ ծնողը չի կարող հանգիստ քնել, քանի դեռ իր երեխան տուն չի եկել, ու մենք արդեն 22 տարի է, որ ապրում ենք մեր տղաներին մի օր դիմավորելու հույսով»:
Կարդացեք նաև
Նա վստահեցնում է, որ ՀՀ ՊՆ-ն ամեն ինչ անում է հայ գերիների վերադարձի համար. «Մենք ինքներս դա զգում ենք,- ասում է նա,- բայց Ադրբեջանն այնպիսի թշնամի է, որի վրա նույնիսկ Եվրամիությունը չի կարողանում ազդել»:
Ինչ վերաբերում է անհետ կորած ազատամարտիկների հարազատների սոցիալական վիճակին, բանախոսներն ասացին, որ պետությունը միշտ իրենց կողքին է եղել. «Այնպես չէ, որ միայն թոշակ ենք ստանում: Երբևէ չի եղել, որ դիմեմ որևէ ղեկավարի, ու չօգնի»,- ասում է անհայտ կորած ազատամարտիկ Գագիկ Նահապետյանի այրի Վալյա Մուրադյանը:
Սիրանուշ ՀԱՅՐԱՊԵՏՅԱՆ
