Խաղաղության և ժողովրդավարության ինստիտուտի տնօրեն Լեյլա Յունուսը բողոքի ցույց է անցկացրել Բաքվում ՆԱՏՕ-ի խորհրդարանական վեհաժողովի «Ռոզ Ռոթ» սեմինարի ժամանակ, փոխանցում է «Կոնտակտ» լրատվականը:
«Fours Seasons» հյուրանոցում հունիսի 16-ին «Հարավային Կովկաս. մարտահրավերներ և հեռանկարներ» մեկնարկած ժողովի ընդմիջմանը Յունուսը միջոցառման մասնակիցներին է բաժանել Ադրբեջանում տեղի ունեցող բռնաճնշումների դեմ ԽԺԻ-ի հայտարարության տեքստը, իսկ նրա աջակիցները պարզել են «Ազատություն խղճի դատապարտյալներին» գրությամբ պաստառներ:
«Ի՞նչ եվրաինտեգրման և կայունության մասին եք խոսում, երբ երկրում 130 քաղբանտարկյալ կա», – ներկաներին ասել է Յունուսը՝ նշելով, որ Ադրբեջանը չունի ապագա այնպիսի կոռուպցիայի և ավտորիտարիզմի պայմաններում, որն առկա է երկրում:
Նա դիմել է ԵԱՀԿ Մինսկի խմբի նախկին համանախագահ, Ադրբեջանի նախկին դեսպան Մեթյու Բրայզային՝ խնդրելով, որ իր ելույթի ժամանակ իրական գնահատական տա երկրում տեղի ունեցող դեպքերի մասին:
Կարդացեք նաև
Իրավապաշտպանը նաև խոսել է Հայաստանի օգտին լրտեսության մեջ մեղադրվող լրագրող Ռաուֆ Միրկադիրովի մասին՝ նշելով, որ նրա դեմ մեղադրանք է ներկայացվել միայն այն բանի համար, որ նա մասնակցել է հայ-ադրբեջանական համատեղ կայքի ստեղծման նախագծին:
Վերջում Յունուսը ներկաներին մաղթել է հաճելի թեյըմպում և զգուշացրել. «Ձեր լուռ համաձայնությամբ Ալիևի համակարգը ոչնչացնում է ժողովրդավարության գաղափարները, ինչը երկրի աղետալի վախճանին կհանգեցնի»:
Սեմինարին մասնակցելու համար նաև Բաքու է մեկնել հայկական պատվիրակություն, որի անդամներն են՝ «Ժառանգություն» խմբակցության պատգամավոր Թևան Պողոսյանը, Ռազմավարական եւ ազգային հետազոտությունների հայկական կենտրոնի ղեկավար Ռիչարդ Կիրակոսյանը և ԱԺ Պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը:
Պատրաստեց Հովհաննես ԻՇԽԱՆՅԱՆԸ
