Երևանի 19-ամյա բնակիչ, ԵՃՇՊՀ 2-րդ կուրսի ուսանող, Ջոն Խալաթյանը մեղավոր է ճանաչվել՝ ՀՀ քրեական օրենսգրքի 104-րդ հոդվածի 1-ին մասով՝ անչափահասին սպանելու համար և դատապարտվել 11 տարվա ազատազրկման:
Դատավճռով մասնակիորեն բավարարվել է տուժողի իրավահաջորդ Լ.Մարգարյանի քաղաքացիական հայցը՝ ամբաստանյալ Ջ.Խալաթյանից հօգուտ Լ.Մարգարյանի պետք է բռնագանձվի մեկ միլիոն հինգ հարյուր հազար ՀՀ դրամ՝ որպես հուղարկավորության հետ կապված անհրաժեշտ ծախսերի հատուցում:
Ըստ մեղադրանքի, 2013 թվականի նոյեմբերի 20-ին ժամը 14.00-ի սահմաններում Հայաստանի պետական ճարտարագիտական համալսարանի բակում փոխադարձ կատակների կապակցությամբ վիճաբանել է իրենց թաղամասի բնակիչ և իրենց համալսարանի ուսանող, անչափահաս Կարեն Մարգարյանի հետ, որի ընթացքում վերջինս ապտակել է Ջ.Խալաթյանին:
Վերոհիշյալ միջադեպից իրեն նվաստացած զգալով, նույն օրը, ժամը 15.30-ի սահմաններում Ջոն Խալաթյանը տանից իր հետ վերցրել է ծալովի դանակ, վրդովված իջել շենքի բակ և տեղյակ լինելով, որ իրենց շենքի դիմաց Կ.Մարգարյանի հորաքույրը ունի տաղավար ու նա պարբերաբար այցելում է այնտեղ, ժամը 15.35-ից սկսած սպասել է նրան:
Ժամը 16.10-ին տեսնելով տաղավար մտնող Կ.Մարգարյանին` կանչել է նրան և միասին մտնել են շենքի մուտք, «որտեղ Ջոն Խալաթյանն ապօրինաբար Կարեն Մարգարյանին կյանքից զրկելու դիտավորությամբ», իր հետ նախապես վերցրած դանակով երկու անգամ հարվածել է նրան: Տուժողին պատճառված վնասվածքների հետևանքով առաջացած հեմոռագիկ շոկի հետևանքով Կարեն Մարգարյանը ժամը 17.40-ին «Սուրբ Գրիգոր Լուսավորիչ» բժշկական կետրոնում մահացել է:
Առաջադրված մեղադրանքում ամբաստանյալ Ջոն Խալաթյանն իրեն մեղավոր չի ճանաչել: Ըստ նրա ցուցմունքի, տուժող, թաղի բնակիչ Կարեն Մարգարյանի հետ ունեցել է որոշակի տարաձայնություններ՝ փոխադարձ կատակներ անելու պատճառով:
2013թ. նոյեմբերի 20-ին ինքը սովորականի պես գնացել է դասի, հետո դուրս եկել քայլելու և պատահաբար հանդիպել Կարենին, որի հետ եղել են իրեն անծանոթ մի քանի տղա: Որոշելով, որ հարմար առիթ է նախկինում ունեցած տարաձայնությունները հարթելու և հաշտվելու համար` մոտեցել է նրան և սկսել խոսել, որի ընթացքում Կարենը իրեն կրկին վիրավորել է և իրենց միջև մի քանի րոպե տևողությամբ քաշքշուկ է առաջացել, որի ընթացքում վնասվել է իր ոտքը ու ինքը հեռացել է:
Ավելի ուշ իրենց շենքի դիմաց գտնվող կրպակավարի մոտով անցել է Կարենը և, տեսնելով իրեն, ասել է` «արա էս հլը սաղ էս» ու մտել հորաքրոջ` Արփիկի կրպակ:
Մանրամասները կարող եք կարդալ` pastinfo.am-ի կայքում
