Այսօր Հայաստանի Երիտասարդական հիմնադրամում ՀՀ ԱՆ Պրոֆ. Ռ.Հ. Յոլյանի անվան արյունաբանական կենտրոնի տնօրեն Սմբատ Դաղբաշյանը դոնորի միջազգային օրվա կապակցությամբ իր զեկույցում նշեց, որ հազարավոր կյանքեր են փրկվում աշխարհում արյան փոխներարկման շնորհիվ: «Դարձիր հերոս, նվիրիր արյուն» խորագիրը կրող կոնֆերանսի ժամանակ պրն Դաղբաշյանը հայտնեց, որ Հայաստանում տարեցտարի ավելանում է դոնորների եւ հավաքագրվող արյան քանակը: Ըստ նրա փոխանցած տվյալների՝ 2013 թվականին Հայաստանում կատարվել է 13 հազար արյունատվություն:
Սմբատ Դաղբաշյանը տեղեկացրեց, որ Առողջապահության համաշխարհային կազմակերպության տվյալների համաձայն արյան բաղադրամասերով եւ պատրաստուկներով երկիրը ամբողջովին ապահովելու համար երկրի 1000 բնակչի համար անհրաժեշտ է 40 դոնոր:«Մինչդեռ Հայաստանում 1000 բնակչին բաժին է հասնում ընդամենը 3 դոնոր: Այդ ցուցանիշներին հասնելու համար դեռ շատ անելիքներ ունենք»:
Կարդացեք նաև
Պրն Դաղբաշյանը հորդորեց, որ արյուն ունենալու համար անհրաժեշտ է գիտակցել, որ միայն կամավոր կերպով հանձնած արյան շնորհիվ է, որ հնարավոր կլինի փրկել արյան կարիք ունեցող մարդկանց կյանքը: «Շատ կարեւոր է, որ այս գաղափարը արմատանա մեր հասարակության մեջ դեռեւս վաղ հասակից: Պետք է ձգտել, որ Հայաստանում արյան դոնորությունը լինի կամավոր անվարձահատույց»: Պրն Դաղբաշյանը տեղեկացրեց, որ դոնորության հետ կապված ծրագրերի, արյան ծառայության ստորաբաժանումների ժամանակակից սարքերով ապահովելու խնդիրները միշտ եղել են հասարակական կազմակերպությունների եւ գերատեսչությունների , ՀՀ առողջապահության նախարարության ուշադրության կենտրոնում:
Կոնֆերանսի ավարտին պատվոգրեր շնորհվեցին դոնորության ծրագրերի բոլոր ակտիվ մասնակիցներին: Նրանց շարքում էին Radio Van-ի աշխատակիցները, Հայաստանի երիտասարդական հիմնադրամը, Հայաստանի պետական տնտեսագիտական համալսարանը, Երկիր Մեդիա հեռուստաընկերության լրագրող Աննա Դավթյանը, DJ Վակցինան եւ այլք:
Էլյա ՀՈՎՀԱՆՆԻՍՅԱՆ
