Ֆուտբոլի աշխարհի առաջնությունը միայն լավագույն ֆուտբոլային երկիր
ճանաչվելու համար անզիջում պայքար չէ: Այն նաեւ կոմերցիոն կատաղի պատերազմ է:
Առաջատար մարզական ապրանքանիշերը պայքարում են Մունդիալի մասնակից հավաքականներին հագցնելու բացառիկ իրավունքի համար ու այդ նպատակով աստղաբաշխական պայմանագրեր են առաջարկում ազգային ֆեդերացիաներին: Այս պայքարում վերջին 30 տարիներին գլխավոր մրցակիցներ են Adidas-ը, Puma-ն, Nike-ը եւ Umbro-ն:
Ֆուտբոլիստները, անկախ իրենց նախասիրություններից, պարտավոր են առաջնության ընթացքում կրել իրենց տեխնիկական հովանավորի մարզահագուստը: Բացառություն են կազմում միայն խաղակոշիկները եւ դարպասապահի ձեռնոցները: Եվ քանի որ վերոնշյալ բրենդների տարբերանշանները միասին առաջին անգամ ամբողջական թիմերի խաղացողների կրծքին երեւացել են 1994 թվականի աշխարհի առաջնության ժամանակ, հետաքրքիր է իմանալ, թե դրանցից ո՞րն է իր հովանավորյալ թիմին ավելի շատ չեմպիոն դարձրել: Եվ այսպես:
1994 թվական, Բրազիլիա, խաղացել է Umbro մարզահագուստով:
1998 թվական, Ֆրանսիա, խաղացել է Adidas մարզահագուստով:
2002 թվական, Բրազիլիա, խաղացել է Nike մարզահագուստով:
2006 թվական, Իտալիա, խաղացել է Puma մարզահագուստով:
2010 թվական, Իսպանիա, խաղացել է Adidas մարզահագուստով:
Այսպիսով, Adidas-ը աշխարհի չեմպիոն դարձրել եւ դարձել է երկու անգամ, իսկ Nike-ը, Puma-ն եւ Umbro-ն՝ մեկական:
Այս առաջնությունում նույնպես մարզական ֆիրմաների հեռակա պայքարը շարունակվում է: Եվ ոչ միայն որակական, այլեւ՝ քանակական առումով:
Կարդացեք նաև
Nike-ի համազգեստը Մունդիալ-2014-ում կրում է տասը երկիր. Բրազիլիա, Խորվաթիա, Ավստրալիա, Նիդեռլանդներ, Հունաստան, Անգլիա, Ֆրանսիա, Պորտուգալիա, ԱՄՆ, Հարավային Կորեա:
Adidas-ը հագցնում է մեկ երկիր պակաս. Մեքսիկա, Իսպանիա, Կոլումբիա, Ճապոնիա, Արգենտինա, Նիգերիա, Բոսնիա եւ Հերցեգովինա, Գերմանիա, Ռուսաստան:
Puma-ի ծառայություններից օգտվում է ութ հավաքական. Կամերուն, Չիլի, Կոտ-դ’Իվուար, Ուրուգվայ, Իտալիա, Շվեյցարիա, Գանա, Ալժիր:
Juma-ն հովանավորել է Հոնդուրասին, Uhlsport-ը՝ Իրանին, Lotto-ն՝ Կոստա-Ռիկային, Burrda Sports-ը՝ Բելգիային, Marathon-ը՝ Էկվադորին:
ԱՇՈՏ ՀԱԿՈԲՅԱՆ
«Առավոտ» օրաթերթ
13.06.2014
