ԲՀԿ խմբակցության քարտուղար Նաիրա Զոհրաբյանն այսօր ԱԺ ճեպազրույցների ժամանակ անդրադարձավ նաեւ ռուս վերլուծաբան Դմիտրի Կիսելյովի այցին, նրա պահվածքին. «Ես զարմացա, երբ խորհրդարանից դուրս գալիս տեսա իմ որոշ պատգամավոր գործընկերներին, լրագրող գործընկերներին, որ սպասում էին Կիսելյովին։ Ինձ մի պահ թվաց, թե Դալայ Լաման է գալիս Ազգային ժողով, բայց պարզվեց, որ սպասում են մի վերլուծաբանի, ում քծնանքն առ Պուտին ավելի նողկալի է, քան նողկալի էր սովետական ժամանակներում առ Չեռնենկո, Անդրոպով և Բրեժնև եղած քծնանքը, որ մենք տեսել ենք, հիշում ենք»:
Նա նաեւ ասաց, որ եթե սեփական երկրի բարձրագույն քաղաքական մարմնի՝ խորհրդարանի հարթակում թույլ ես տալիս, որ ինչ որ մեկը թքի քո երեսին, անարգի քեզ, ապա անպայման կգտնվի այն «լժե-վերլուծաբանը», որը իրեն թույլ կտա անկիրթ եւ անդաստիարակ լինել եւ փորձել դաստիարակել եւ սովորեցնել մեզ»:
Իսկ թե ո՞ւմ մեղքն էր Կիսելյովի պահվածքը, նա պատասխանեց. «Բոլորիս: Պատասխանատուն նրանք են, ովքեր խաշած ժպիտներով նստել էին նրա հետ եւ թույլ էին տալիս, որ ինչ-որ վելիկոռուսական շովինիզմով տառապող մեկը գա եւ անարգի մեր երկիրը»:
Մելանյա ԲԱՐՍԵՂՅԱՆ
