ՀՀԿ պատգամավոր ԱՐՏԱԿ ԴԱՎԹՅԱՆԸ կարծում է, որ այն պահին, երբ Կիսելյովը հոխորտացել է, թե Հայաստանում քիչ են ռուսական դպրոցներն ու դասաժամերը, իսկ հայ վարորդը չգիտի ռուսերեն, ներկաները միանգամից պետք է դադարեցնեին ռուսերենով հաղորդակցվել ու դիմեին թարգմանչի օգնության: «Սա կլիներ տեղին պատասխան՝ գտնվում եք Հայաստանի Հանրապետությունում, ուրեմն չի՛ կարելի նման հայտարարություններ անել»:
Ցանկացած օտարերկրյա չինովնիկ պետք է հասկանա, որ իր այդպիսի պահվածքը խստորեն դատապարտելի է ե՛ւ Հայաստանի հասարակության, ե՛ւ իշխանության կողմից, իսկ սա նշանակում է, որ պետք է լսվի անհրաժեշտ հակադարձումը:
Այս առումով Արտակ Դավթյանը կարծում է, որ մենք պետք է պարզ ու հասկանալի լեզվով ասենք՝ հարգում ենք մեր ռազմավարական գործընկերոջ ազգային արժանապատվությունը, բայց նաեւ պահանջում նման հարգանք մեր հանդեպ. «Եթե մեր հարաբերությունները պետք է զարգանան մի դաշտում, ուր կա անկեղծության, փոխադարձ հարգանքի պակաս, դա չի կարող լինել արդյունավետ: Խոսում է անվտանգության մասին ու մեջտեղ բերում լեզվի խնդիրը. հիմա ես ի՞նչ հետեւության հանգեմ: Չէ՞ որ մեր լեզվի հանդեպ ցանկացած ոտնձգություն ուղղված է մեր ինքնությանը»:
Պատգամավորը վրդովված է, որ արդեն որերորդ անգամ ռուս չինովնիկներն իրենց թույլ են տալիս նման արտահայտություններ՝ առանց գիտակցելու, թե դրանք իրականում ինչ վտանգներ են պարունակում: «Պետք է մի պարզ բան հասկանան. ոչինչ այնքան խորը չի վիրավորում մարդուն, որքան ազգային արժանապատվությանն ուղղված վիրավորանքը»: Դատապարտելով նման պահվածքը՝ Դավթյանը նկատեց. «Մեր մեղքի բաժինը եւս կա: Կարծում եմ, մեր կոշտ արձագանքով պետք է հասկացնենք, որ հետայսու ՌԴ դեսպանը Հայաստան եկող մեծ ու փոքր չինովնիկներին նախազգուշացնի զուսպ լինել»:
Կարդացեք նաև
Արմինե ՍԻՄՈՆՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
