«Սա առաջին դեպքը չէ, որ ռուսական պաշտոնյաները կամ ռուսական քարոզչամեքենայի առաջնային դեմքերը ոչ միայն նմանատիպ հայտարարություններով, այլև պնդումներով են հանդես գալիս»,-Aravot. am-ի հետ զրույցում վրդովմունքով փաստեց «Ազատ դեմոկրատներ» կուսակցության նախագահ Խաչատուր Քոքոբելյանը՝ անդրադառնալով «Ռոսիա սեգոդնյա» տեղեկատվական գործակալության գլխավոր տնօրեն Դմիտրի Կիսելյովի՝ ՀՀ ԱԺ-ում հնչեցրած հայտարարություններին՝ մասնավորապես, ռուսերենը ՀՀ երկրորդ պետական լեզու հռչակելու մասին:
Ըստ պարոն Քոքոբելյանի՝ ՀՀ իշխանությունները նաև քաղաքական մյուս ուժերը համարժեք պատասխան չեն տալիս, և ստեղծված իրավիճակը ոչ ադեկվատ և ոչ հետևողական վերաբերմունքի արդյունքն է: Խաչատուր Քոքոբելյանը հավելեց. «Ոչ թե մեղադրում եմ ռուսական կողմի պահանջատիրական մոտեցումն իրենց լեզվի գերակայության և անգամ հավասարեցման հետ կապված, այլ մեր պետական պաշտոնյաների ոչ համարժեք մոտեցումները: Ակնհայտ է, որ այսօրվա և ոչ միայն այսօրվա, իշխանությունները կախված են եղել ռուսական իշխանություններից իրենց վարած ոչ ճիշտ քաղաքականության պատճառով»:
Հետաքրքրվեցինք՝ արդյո՞ք «Ազատ դեմոկրատներ» կուսակցությունը արձագանքելո՞ւ է, պարոն Քոքոբելյանը պատասխանեց. «Ազատ դեմոկրատները և ինքս նաև Ռուսաստանի դեսպանի հայտարարությունների կապված բազմիցս հանդես ենք եկել ու գնատականներ տվել»: Պարոն Քոքոբելյանը նշեց, թե հնարավոր է հանդես գա օրենսդրական նախաձեռնությամբ՝ լեզվի մասին օրենքում փոփոխություններ կատարելու հարցով: Այնուհետև հավելեց. «Համաձայն այդ նախաձեռնության՝ կսահմանվի որոշակի պատասխանատվություն՝ օրենքի խախտման դեպքում: Եթե պետական պաշտոնյան օրենքի խախտումով է հանդես գալիս, ապա նա պատասխանատվություն պիտի կրի դրա համար մինչև աշխատանքից հեռացում: Եթե ինքնակամ չունեն այդ պատասխանատվության զգացումը, ապա օրենքով ստիպված կլինեն այն ունենալ»:
Տաթև ՀԱՐՈՒԹՅՈՒՆՅԱՆ
