Գլխավոր մարզիչ Լուիս Ֆելիպե Սկոլարիի թիմն ընդունում է աշխարհի առաջնությանը չորրորդ անգամ մասնակցող Խորվաթիայի ընտրանուն, որը հայտնի է իր բնավորությամբ: Հետեւաբար, բրազիլացիներին, որոնք այս առաջնությունում հաղթողի գլխավոր ֆավորիտն են համարվում, այնքան էլ հեշտ չի լինելու:
Ճիշտ է, ամբողջ ստադիոնը եւ երկիրը երկրպագելու, ոգեւորելու են աշխարհի հնգյակի չեմպիոններին, սակայն դա լրացուցիչ բեռ ու պատասխանատվության զգացում կարող է դառնալ նրանց համար, ինչը ձեռնտու կլինի մրցակցին:
Խորվաթների գլխավոր մարզիչ Նիկո Կովաչը բավականին մարտունակ թիմ է հավաքել ու ֆուտբոլիստներն էլ դժվար թե Բրազիլիա ժամանել են միայն առաջնությանը մասնակցած լինելու նպատակով:
Նախօրեին ահա, թե ինչպես են արտահայտվել կողմերը իրենց մտադրությունների ու հնարավորությունների մասին:
Կարդացեք նաև
Լուիս Ֆելիպե Սկոլարի: Բրազիլիայի հավաքականի գլխավոր մարզիչ. «Ես մտածում եմ միայն Խորվաթիայի հետ խաղի մասին: Մենք լավ ենք նախապատրաստվել: Բոլոր ֆուտբոլիստները պատրաստ են: Ամեն բան ընթանում է ըստ պլանի: Ես անգամ կասեի, որ ամեն ինչ հիանալի է: Խաղից առաջ լավ կքնեմ»:
Նեյմար: Բրազիլիայի հավաքականի հարձակվող. «Ինձ համար մեծ պատիվ է` խաղալ Սկոլարիի թիմում, որին ես հաղթող եմ համարում: Իսկ 10 համարի մարզաշապիկն ինձ շատ բան է պարտավորեցնում»:
Նիկո Կովաչ: Խորվաթիայի հավաքականի գլխավոր մարզիչ. «Իհարկե, Բրազիլիան այս հանդիպման ֆավորիտն է: Բայց մենք լավատեսորեն ենք տրամադրվում եւ չենք պատրաստվում սպիտակ դրոշ ճոճել: Եթե կարողանանք հավատարիմ մնալ մեր պլանին, շանս կունենանք»:
Աշոտ ՀԱԿՈԲՅԱՆ
