Հունիսի 8-ին Սյունիքում կայացած տեղական ինքնակառավարման մարմինների ընտրությունների արդյունքներով` ընտրված համայնքի ղեկավարները հիմնականում հանրապետականներ են:
Սյունիքի թիվ 37 ընտրատարածքն ընդգրկող Սիսիանի Թանահատ գյուղում վերընտրվեց ՀՀԿ-ական գյուղապետ Արսեն Օհանյանը: Այստեղ 36 ընտրողից ընտրությանը մասնակցել է 19 հոգի, որից 4-ը քվեարկել է անկուսակցական Արծրունի Ղուկասյանի օգտին, իսկ 15 ընտրող` գործող գյուղապետ, ՀՀԿ անդամ Արսեն Օհանյանի:
Գորիսում եւս ընտրված համայնքի ղեկավարը ՀՀԿ-ից է: ՀՀԿ-ական Վաչագան Ադունցը հավաքել է 4 հազար 732 քվե, իսկ անկուսակցական Հրայր Յոլյանը` 2 հազար 956:
Սյունիքի թիվ 38 ընտրատարածքն ընդգրկող Կապանի տարածաշրջանի Աճանան գյուղական համայնքում եւս ընտրվեց, ՀՀԿ-ից առաջադրված, 2003թ-ից առ այսօր համայնքը ղեկավարող Վաչե Ավետիսյանը` 89 քվեով, իսկ անկուսակցական, ինքնաառաջադրված, Գագիկ Հայրապետյանը հավաքեց ընդամենը 5 ձայն:
Կապանի տարածաշրջանի մեկ այլ գյուղական համայնքում` Օխտարում, հունիսի 8-ին կայացած համայնքի ղեկավարի ընտրության արդյունքներով`կրկին ընտրվեց գործող գյուղապետը, որը սակայն, ոչ թե ՀՀԿ-ից է, այլ` ՀՅԴ-ից: 2000թ.-ից մինչեւ օրս համայնքի ղեկավար, ՀՅԴ անդամ Վաղարշակ Համբարձումյանի օգտին քվեարկել է 38 ընտրող, իսկ անկուսակցական Վաչե Զաքարյանին ընտրել է 5 ընտրող:
Ինչպես փոխանցեցին Սյունիքի թիվ 38 ընտրատարածքային ընտրական հանձնաժողովից` Օխտար եւ Աճանան գյուղական համայքներում ընտրություններն անցել են բնականոն հունով, ընտրախախտումների վերաբերյալ բողոք-դիմումներ չեն գրանցվել:
Կարդացեք նաև
Մերի ՍՈՂՈՄՈՆՅԱՆ
