«Դրական բան կա, որ քառյակը փորձում է երկրի կառավարման պրոցեսին մասնակցել, բայց ներկայացման ձևը ճիշտ չէր որդեգրված»,-Aravot.am-ի հարցին ինչպե՞ս է գնահատում ոչ իշխանական քառյակի ներկայացրած 12 կետանոց պահանջը, «Երիտասարդ Եվրասիա» խորագրով Եվրասիական երիտասարդական համաժողովի բացման արարողությանը այսպիսի կարծիք հայտնեց ՀՀ ԱԺ նախագահ Գալուստ Սահակյանը:
Հիշեցնենք, որ հունիսի 10-ին ոչ իշխանական չորս ուժերը`ՀԱԿ, ԲՀԿ, ՀՅԴ եւ «Ժառանգություն», հրապարակեցին 12 կետից բաղկացած իրենց հայտարարությունը:
Գալուստ Սահակյանը, պահանջների ներկայացման ձևը քննադատելով, շարունակեց. «Չի կարելի մի բան ներկայացնել, և դա փորձել հասարակությանը մատուցել այնպես, որ սա պահանջ է, ոչ թե մասնակցություն: Մենք դա ընկալում ենք որպես մասնակցություն, և այն խնդիրները, որ 12 կետերում արտահայտված են, դա հենց այն նոր որդեգրումների մի մասն է, որը կառավարությունը ձեռնարկում է: Մենք պատրաստ ենք քննարկել ցանկացած հարց»:
Մեր հարցին`կա՞ն կետեր, որոնք սկզբունքորեն անընդունելի են, պարոն Սահակյանը պատասխանեց. «Այն հարցերը, որոնք չեն համատեղվում հնարավորությունների և գործողության մեջ դնելու առումով, բնական է` դրանք քննարկելի են: Այսինքն`մի բան է խորհուրդ տալը, իսկ մենք սիրում ենք դա անել, և այլ բան են հնարավորությունները: Այն հնարավորությունները, որ կան, կփորձենք ուղղորդել նաև այդ 12 կետերին որոշակիորեն լուծում տալու համար: Համենայն դեպս, դա արդեն իսկ մեր ծրագրերի մի փոքրիկ բաղկացուցիչ մասն է»:
Կարդացեք նաև
Տաթև ՀԱՐՈՒԹՅՈՒՆՅԱՆ
Խելքա է խելք,՝ լոխ սերտ ու ջիգիար։