ԱՄՆ-ից Հայաստան ժամանած պլաստիկ վիրաբույժ Արթուր Սալիբյանը եւ «Հայ Ամերիկյան Առողջության Կենտրոնի» վիրահատական բաժանմունքի ղեկավար, վիրաբույժ-ուռուցքաբան Արմեն Քոչարյանը այսօր «Նոյյան Տապան» մամուլի սրահում ներկայացրին, որ Հայաստանում արդեն կատարվում է կրծքագեղձի համատեղ վիրահատություն: Վիրահատության ընթացքում կատարվում է կրծքագեղձի բուն գեղձային հյուսվածքի հեռացում եւ մաշկի տակ պրոթեզի տեղադրում, որի արդյունքում պահպանվում է կրծքագեղձի մաշկը եւ պտուկը:
Արթուր Սալիբյանի խոսքերով՝ վիրահատության արդյունքները էսթետիկական եւ օնկոլոգիական տեսանկյունից շատ ավելի նախընտրելի են. «Կրծքագեղձի քաղցկեղի ժամանակ վիրահատության արդյունքում հեռացվում է հիվանդ կրծքագեղձը, մինչդեռ այս նոր մեթոդի շնորհիվ պահպանվում է պտուկը եւ կրծքագեղձի մաշկը: Եվ, տեղադրելով պրոթեզը, ամբողջովին պահպանվում է կրծքի էսթետիկական տեսքը»:
Aravot.am-ի հարցին ի պատասխան՝ վիրաբույժը տեղեկացրեց, որ Հայ-ամերիկյան առողջության մամոգրաֆիայի կենտրոնում նմանատիպ վիրահատություն արդեն անցկացվել է 5-ից ավելի անգամ. «Կոնկրետ մեկ վիրահատություն եղել էր ցուցադրական, սակայն, ընդհանուր առմամբ, պրն Սալիբյանը Հայաստանում անցյալ տարվանից սկսած կատարել է արդեն 5-ից ավելի վիրահատություններ»: Դիմողների այս քիչ քանակը բժիշկը պայմանավորում է նրանով, որ դեռեւս տեղեկացվածության պակաս կա կանանց շրջանում: «Սա նորարարություն է եւ միջոցառումների շնորհիվ պետք է կանանց տեղեկացնել, որ այս տիպի համատեղ վիրահատությունը բավականին մատչելի է եւ արագ»:
Պրն Սալիբյանը նշեց,սակայն, որ այս վիրահատությունը ոչ բոլոր ուռուցքների հեռացման դեպքում է կիրառվում. «Կան ուռուցքներ, որոնք այսպիսի վիրահատության ենթակա չեն եւ երբեմն քիմիոթերապիայի, ճառագայթային բուժման անհրաժեշտություն է լինում: Այս պայմաններում հնարավոր չի լինում կատարել վիրահատությունը եւ մաշկի պահպանումը»:
Կարդացեք նաև
Բժիշկները լրագրողներին տեղեկացրին, որ մինչեւ ներկա պահը կատարվել են միայն բարեգործական վիրահատություններ. «Մենք հիվանդներից գումար չենք վերցնում, բոլոր ծախսերը պրն Սալիբյանը ինքն է հոգացել եւ վիրահատությունը կատարվել է անվճար: Իսկ ընդհանրապես, այդ վիրահատությունները մատչելի են: Չեմ կարող գումարր նշել, ես չգիտեմ՝ դա ինչ արժե, բայց գիտեմ հաստատ, որ մեր հասարակության համար այն մատչելի կլինի»:
Պրն Սալիբյանը տեղեկացրեց, որ այս մեթոդով վիրահատությունը առաջին անգամ կատարվել է ԱՄՆ-ում 10 տարի առաջ:
Էլյա ՀՈՎՀԱՆՆԻՍՅԱՆ
