Այսօր Վարչական դատարանում Ոստիկանությունն ընդդեմ քաղաքացիական ակտիվիստ Սուրեն Սահակյանի միանգամից երկու գործ էր քննվում:
Երկուսն էլ նախորդ տարի քաղաքապետարանի դիմաց տեղի ունեցող նստացույցի դեպքերին են վերաբերում:
Կեսգիշերին քաղաքապետարանի աստիճաններին քնելու եւ բարձրախոսով աշխատանքային ժամին խոսելու համար ոստիկանությունը պահանջում է վարչական պատասխանատվության ենթարկել ակտիվիստին:
Այսօր դատարանում երկու գործով էլ հետազոտվեց Սուրեն Սահակյանի փաստաբանի ներկայացրած դեպքի օրվա տեսանյութերը:
Կարդացեք նաև
Ոստիկանության ներկայացուցիչ Սոնա Մելիքյանը պնդում էր, որ տեսանյութում երեւում է, թե ինչպես է ոստիկանը օրինական պահանջ ներկայացրել՝ մի դեպքում բարձրախոսով չխոսելու, մյուս դեպքում աստիճաններն ազատելու վերաբերյալ, փաստաբանն էլ առարկում էր, թե ոստիկանը ոչ մի օրինական պահանջ Սուրեն Սահակյանին չի ներկայացրել:
Սոնա Մելիքյանը պնդում էր, որ մոնտաժված տեսանյութ է, իսկ երբ ակտիվիստի փաստաբանը միջնորդեց, որ դատարանը ոստիկանությունից պահանջի իրենց ձեռքի տակ եղած տեսանյութերը բերել, ոստիկանության ներկայացուցիչն ասաց՝ չունեն, չեն պահպանել:
Հետո ակտիվիստի փաստաբանը երկու գործով էլ միջնորդեց դատական նիստը մեկ օրով հետաձգել, որ ինքը կարողանա դատական ծախսերի վերաբերյալ տեղեկանք ներկայացնի դատարան: Ոստիկանության ներկայացուցիչն առարկեց, բայց դատարանը բավարարեց միջնորդությունը երկու գործերի քննությունն էլ հետաձգելով վաղը:
Ակտիվիստի Փաստաբանն էլ կրկին պնդեց, որ ոստիկանության հայցն անհիմն է եւ ենթակա է մերժման:
Արփինե ՍԻՄՈՆՅԱՆ
