Օրերս «Գեոինֆո» գիտա-կիրառական կենտրոնը «Անտառների հասարակական մոնիթորինգ» ծրագրի շրջանակներում անտառի ապօրինի գործունեությունների վերաբերյալ Վանաձորի Օրհուս կենտրոնում դասընթաց և դաշտային աշխատանք էր կազմակերպել:
«Այսօր Հայաստանում կա խնդիր. ամեն մի մարդ, ամեն մի բնապահպան, որ հետաքրքրված է մեր անտառներով, տեսնելով հատումներ, ինչ-որ գործողություններ, միանգամից դրանք ներկայացնում է որպես ապօրինություններ, բայց դա ոչ բոլոր դեպքերում է այդպես: Իրականում անտառում կան գործողություններ, որոնք օրինական են, այսինքն` ունենք օրինական հատումների ֆոն»,-Aravot.am-ի հետ զրույցում ասում է դասընթացի մասնակից, ՀՀ գյուղատնտեսության նախարարության «Հայանտառ» ՊՈԱԿ-ի աշխատակից Վահե Մացակյանը:
Նա նշում է, որ դասընթացի նպատակներից մեկն էլ հասարակությանը իրազեկելն է, թե որն է համարվում ապօրինություն:
«Այսինքն` պետք է ճիշտ գնահատել երեւույթը, որպեսզի ապօրինության բացահայտումը թիրախային չլինի»,-նկատում է նա:
Կարդացեք նաև
«Գեոինֆո» գիտա-կիրառական կենտրոնի կողմից սկսած 2014թ. ապրիլից մինչև 2015թ. փետրվար իրականացվելու է «Հայաստանի անտառների հասարակական մոնիթորինգ» ծրագիրը:
Ծրագրի հիմնական նպատակն է բացահայտել Հայաստանի անտառների ապօրինի գործունեությունները, գրանցել, հավաքագրել և ներկայացնել հասարակությանը:
Անտառների հասարակական մոնիթորինգի կատարման նպատակով Հայաստանի տարածքում կազմակերպության կողմից կստեղծվեն տեղական ակտիվիստ խմբեր, որոնցում կներառվեն ՀԿ-ներ, բնապահպանական կազմակերպություններ և տեղացիներ:
Անուշ ԲՈՒԼՂԱԴԱՐՅԱՆ
