«Ես կխնդրեմ հանձնաժողովներից որևէ մեկին, որպեսզի լսումների կազմակերպչական աշխատանքներն իր վրա վերցնի»,- այսօր խորհրդարանում, լրագրողների հետ ճեպազրույցում ասաց ՀՀ ԱԺ նախագահ Գալուստ Սահակյանը`հավելելով, որ իր համոզմամբ՝ Աստանայի ֆորումի և դրան հաջորդած իրադարձությունների վերաբերյալ խորհրդարանական լսումներ հրավիրելու անհրաժեշտություն չկա, քանի որ բոլոր հարցերի պատասխանները հնարավոր է ստացվեն երկու օրից` ԱԺ-կառավարություն հարցուպատասխանի ժամանակ:
Հիշեցնենք, նման առաջարկ հնչել էր ընդդիմադիր պատգամավորների կողմից:
Բայց, հասկանալով, որ հարցուպատասխանի ժամանակ հնարավոր է հարցերի պատասխանները բավարար չլինեն, ավելի վաղ ԱԺ ամբիոնից Գալուստ Սահակյանը լսումների անցկացման մոտավոր ժամկետներ էր նշել` հունիսի 16-17: Բայց եթե անգամ լսումներ անցկացնելու որոշում կայացվի, Գալուստ Սահակյանը հորդորեց դրանից չոգևորվել`թե Աստանայում ծածուկ մի բան է կատարվել. «Պատգամավորների մոտ որոշակի խնդիրներ կան վերլուծման առումով, իհարկե կկազմակերպենք»:
ԱԺ Եվրաինտեգրման հարցերի մշտական հանձնաժողովի նախագահ Նաիրա Զոհրաբյանն էլ Aravot.am-ի հետ զրույցում ասաց, որ պատրաստվում է ԱԺ Արտաքին հարցերի մշտական հանձնաժողովի նախագահ Արտակ Զաքարյանի հետ քննարկել համատեղ լսումներ անցկացնելու հարցը, քանի որ իր նամակին արտգործնախարար Էդվարդ Նալբանդյանը դեռ չի պատասխանել:
Կարդացեք նաև
Նելլի ԳՐԻԳՈՐՅԱՆ
