Սամվել Մարտիրոսյանը տեղեկատվական դաշտում ժամանակավոր հրադադարը պայմանավորում է Էրդողանի եւ գյուլենիստների միջեւ տեղի ունեցող պայքարի հետ
«Մենք ունենք մի իրավիճակ, որտեղ հակահայկական քարոզչությունը վակումային իրավիճակի մեջ է»,- այսօր՝ հունիսի 9-ին, «Տեսակետ» մամլո ակումբում լրագրողների հետ հանդիպման ընթացքում հայտարարեց մեդիափորձագետ Սամվել Մարտիրոսյանը:
Նրա խոսքերով՝ այդ ժամանակավոր հրադադարը պայմանավորված է Թուրքիայում Էրդողանի եւ գյուլենիստների միջեւ տեղի ունեցող պայքարի հետ: Նա նշեց, որ այդ պայքարը բերեց նրան, որ կադրային փոփոխություններ կատարվեցին Թուրքիայում, եւ Թուրքիայի օրինակին հետեւեց Ադրբեջանը.
«Դա տարօրինակ ձեւով մեր վրա էլ ազդեցություն ունեցավ, որովհետեւ աշխատանքից հեռացվեց այն մարդը, որը հակահայկական քարոզչության հիմնական ղեկավարն էր՝ Ադրբեջանի նախագահի ադմինիստրացիայի քաղաքական վերլուծության եւ տեխնիկական ապահովման կենտրոնի ղեկավար Էլնոր Ասլանովը»:
Կարդացեք նաև
Սամվել Մարտիրոսյանը հայտարարեց, որ Ադրբեջանը հիմնականում զբաղված է արտասահմանում իր կենտրոնները ստեղծելով եւ եղած կենտրոններն ուժեղացնելով, իսկ այդ կենտրոնները եւ կազմակերպությունը զբաղվում են լոբբիստական գործունեությամբ: Նա նշեց, որ այդ կազմակերպությունները ղեկավարվում է ԱՄՆ Տեխաս նահանգից, այդ փաստը մեդիափորձագետը պայմանավորեց նրա հետ, որ հիմնական ֆինանսավորումը կատարվում է Ադրբեջանի պետական նավթային կազմակերպության կողմից.
«Այստեղ պետք է հաշվի առնել, որ ԱՄՆ-ում, Եվրոպայում ինքնուրույն գործող կազմակերպություններ կան, որոնք գնալով ավելի ազդեցիկ են դառնում, եւ սա պետք է հաշվի առնել: Պետք չէ մտածել Ադրբեջանական քարոզչությունը դա զուտ իրենց մամուլում հրապարակումներն են, առավել եւս, որ իրենց հրապարակումները բավականին քիչ ազդեցություն ունեն, հիմնականում շատ անորակ են, եւ լրագրողները չեն պատկերացնում ինչպես կարելի է միջազգային հանրության վրա ազդել»:
Հարցին, թե սոցիալական ցանցերի օգտատերերը տեղեկատվական հակամարտության մեջ իրենց մասնակցությունն ունենո՞ւմ են, Սամվել Մարտիրոսյանը պատասխանեց, որ օգտատերերը տեղեկատվական հակամարտության մեջ իրենց դերը ունեն, որի օրինակն է վերջերս սոցիալական ցանցերից մեկով տարածված վարակը, որով ամեն երկրորդը վարակված է, պարոն Մարտիրոսյանի պնդմամբ, դա իսկական վարակ է՝ տրոյան ծրագիր է, որը տեղեկատվություն է գողանում համակարգչից. «Դժվարանում եմ գնահատել, թե ինչ քանակի տեղեկատվություն է Հայաստանից հոսել թուրքական հաքերների ձեռքը, այնպես որ, ավելի լավ է հիգիենայով զբաղվել, քան հակաադրբեջանական նյութեր տարածել»:
Ամի ՉԻՉԱԿՅԱՆ
