Սահմանադրական փոփոխությունների «պատվերը»՝ ըստ Վազգեն Մանուկյանի
«Ես որոշել եմ, որ դրա մասին չեմ խոսում: Եթե ասում են՝ հարյուր օր անցնի, ես ասում եմ՝ հարյուր օրը քիչ էլ է. կես տարի անցնի՝ կխոսենք վարչապետի մասին»,- «Առավոտի» հարցին՝ ՀՀ վարչապետներից որեւէ մեկը չհամարձակվեց բաժանարար գիծը գծել, հիմա դա անում է Հովիկ Աբրահամյանը՝ կհաջողվի՞, այսպես արձագանքեց ՀՀ նախկին վարչապետ, Հանրային խորհրդի նախագահ Վազգեն Մանուկյանը:
Մեզ հետ զրույցում վերլուծելով Հայաստանում սահմանադրական փոփոխությունների պատմությունը՝ պարոն Մանուկյանն ասաց. «Առաջին Սահմանադրությունը երբ ընդունվում էր, Հայաստանում կար հստակ ձեւավորված քաղաքական ուժ, որի ձեռքում էր իշխանությունը: Վերեւից պատվեր կար՝ Սահմանադրությունը ձեւավորել այնպես, որ իշխանությունը հնարավոր լինի իրականացնել: Իշխանության նկատմամբ սաբոտաժ չլինի»: Նաեւ հավելեց. «Այն ժամանակաշրջանի համար ես դա համարում եմ բնական»: ՀՀ երկրորդ նախագահ Ռոբերտ Քոչարյանի օրոք իրականացված սահմանադրական փոփոխությունները Վազգեն Մանուկյանը չի համարում Հայաստանի ներքին մղում. «Դա դրսից պարտադրված կամ խորհուրդ տրված էր, որ ժողովրդավարության տեսակետից պետք է հավասարակշռություն ստեղծել: Իսկ այն ժամանակվա իշխանությունների համար շատ կարեւոր էր, որ Արեւմուտքի կարծիքը կատարվեր: Ներսում դա մեծ փոփոխությունների, բոլորն էլ գիտեին, չէր բերելու»: Թեպետ այն ժամանակ ընդդիմության առաջնորդներից մեկը լինելով՝ Վազգեն Մանուկյանը դեմ էր արտահայտվում սահմանադրական փոփոխություններին, այսօր հետին թվով արձանագրում է, որ ամեն դեպքում՝ քայլ առաջ էր:
Ներկայումս նախաձեռնված սահմանադրական փոփոխությունները մեր զրուցակցի տպավորությամբ՝ առանց պատվերի են: «Այդ տեսակետից ավելի հետաքրքիր է: Այս դեպքում բոլոր ձեռքբերումները եւ սխալները իրականացնողներինն են, ոչ թե թելադրողինը»:
ՆԵԼԼԻ ԳՐԻԳՈՐՅԱՆ
Կարդացեք նաև
«Առավոտ» օրաթերթ
06.06.2014
