«Փյունիկ» հաշմանդամների միությունը, Գյումրիի «Ագաթ» հատուկ կարիքներով կանանց կենտրոն հասարակական կազմակերպությունը եւ ամերիկյան «Մոբիլիթի ինթերնեյշնլ» կազմակերպությունը դրամաշնորհ են ստացել, որպեսզի Հայաստանում իրականացնեն հաշմանդամային սպորտի մասսայականացումն ու զարգացումը:
Այս առիթով Երեւանի քաղաքապետարանում հրավիրված ասուլիսում ներկայացվեց «Սպորտը հանուն հաջողության, հաշմանդամություն ունեցող երիտասարդների համար հնարավորությունների ընդլայնում մասնագիտական փոխանակման ծրագիրը»:
«Փյունիկ» հաշմանդամների միության նախագահ Հակոբ Աբրահամյանը նշեց, որ ԱՄՆ-ից ժամանած փորձագետներն այս ոլորտի մասնագետներ են եւ երկար տարիների փորձ ունեն: Նա հույս հայտնեց, որ այդ փորձն ու ծրագրերն օգտագործելով` Հայաստանում հաշմանդամային սպորտը նոր փուլ կմտնի: Պարոն Աբրահամյանը կարեւորեց նաեւ ներառական սպորտը, որի պակասը այսօր կա, ինչպես նաեւ հաշմանդամներով զբաղվող մարդկանց պատրաստումն ու վերապատրաստումը:
«Մոբիլիթի ինթերնեյշնլ» կազմակերպության ներկայացուցիչը նշեց, որ այս ծրագիրը բազմակողմանի փոխանակման ծրագիր է եւ ուղղված է սպորտային քաղաքականությանը: «Մեր խնդիրն է. սոցիալական ներառման հետ կապված` համագործակցել տեղի մեր գործընկերների հետ եւ սպորտն առաջ տանել հաշմանդամություն ունեցող մարդկանց համար: Մենք ակնկալում ենք այս ծրագրի շրջանակներում մեր փորձը փոխանակել հաշմանդամային սպորտի ռազմավարության ձեւավորման, ղեկավարման ուղղությամբ, ինչպես նաեւ տեխնիկական հմտությունների ուղղությամբ մեր փորձով կիսվել: Դրանք վերաբերում են սայլակներով բասկետբոլին, հեծանվային սպորտին եւ լողին: Նաեւ ուզում ենք ներկայացնել երկու նոր մարզաձեւ` ձեռքով հեծանվային սպորտ եւ հատուկ ջրային սպորտ», – ասաց փորձագետը:
Բոլոր բանախոսները շատ կարեւորեցին, որպեսզի հատկապես հաշմանդամություն ունեցող երեխաները վաղ տարիքից հասկանան սպորտի անհրաժեշտությունն իրենց կյանքում: Սպորտի մեջ ակտիվ լինելը ավելացնում է կյանքի հմտությունները: Դա էլ իր հերթին ավելացնում է տոկոսային հարաբերությամբ մասնակցությունը կրթությանը եւ աշխատանքին:
Կարդացեք նաև
Աշոտ ՀԱԿՈԲՅԱՆ
