«Մենք չենք եկել միջազգային կառույցների մոտ ներկա ստանալու»,-ՀՀ կուսակցությունների մասնակցությամբ հունիսի 4-ին անցկացվող՝ Սահմանադրական բարեփոխումների քննարկմանը, Aravot.am-ի հետ զրույցում այսպիսի կարծիք հայտնեց ՀՀ ԱԺ պետաիրավական հարցերի հանձնաժողովի նախագահ Հովհաննես Սահակյանը:
Հիշեցնենք, որ ՀՀ կուսակցություններից ՀԱԿ-ը և «Ժառանգությունն» ավելի վաղ հայտարարել էին, թե մասնակցում են քննարկմանը ոչ թե բովանդակային առումով, այլ որ իրենց միջազգային գործընկերներն են հրավիրել:
Հովհաննես Սահակյանի համար սա անհարգալից վերաբերմունք է ՀՀ պետականության և Սահմանադրական դատարանի (ՍԴ) նկատմամբ: Փոխարենը նա կարևորեց բովանդակային քննարկումը:
Aravot.am-ի դիտարկմանը՝ ինչո՞ւ է Սահմանադրական դատարանի նախագահն անընդհատ քննադատության թիրախ դարձնում ԱԺ-ն, պարոն Սահակյանը պատասխանեց՝ համաձայնելով Գագիկ Հարությունյանի հետ. «Գագիկ Հարությունյանը բարձրացնում է խնդիրներ, որոնք առկա են: Սահմանադրական բարեփոխումների մասնագիտական այս խումբը, փաստորեն, կարողացել է այս ընթացքում ուսումնասիրել բացերը և դրանք ներկայացնել որպես հանրության սեփականություն»:
Կարդացեք նաև
Հետաքրքրվեցինք՝ Գագիկ Հարությունյանի հետ համաձայն է նաև այն հարցում, որ «ԱԺ-ում կոճակ սեղմելո՞վ են օրենք ընդունում»: Պարոն Սահակյանն արձագանքեց. «Չէի ուզենա վուլգարացնել: Ինքներս տեսնում ենք, որ ԱԺ-ում նույն հարցուպատասխանի ժամանակ մեր ընդդիմախոսները հնչեցնում են իրենց հայտարարությունները՝ չլսելով նաև իրենց գործընկերներին: Տեսնում ենք տեսախցիկային հիվանդությամբ տառապող գործընկերների, որոնք միայն տեսաախցիկի առաջ են թեժ բանավեճ ծավալում: Այնինչ հաճախ ԱԺ-ում տեսնում ենք, որ միայն ՀՀԿ խմբակցության պատգամավորներ են նստած լինում, մինչդեռ այն մարդիկ, ովքեր ընդդիմադիր են, պիտի գան ու հակառակ տեսակետը հայտնեն»:
Հիշեցնենք, որ ԱԺ-ին քննադատելով, ՍԴ նախագահ Գագիկ Հարությունյանը մասնավորապես նշել էր, թե ԱԺ իրավական ակտերի 60 տոկոսը մինչև այժմ չի համապատասխանեցվել Սահմանադրությանը, ինչը հանգեցնում է մարդու իրավունքների ոտնահարմանը:
Հունիսի 4-ին կուսակցությունների մասնակցությամբ սահմանադրական բարեփոխումների հայեցակարգի քննարկման ժամանակ պարոն Հարությունյանը նշեց, թե «ԱԺ-ում կոճակ սեղմելով են օրենք ընդունում», այնուհետև պատմեց, թե գիրքը, որը վերաբերում էր սահմանադրական բարեփոխումներին ու պատմության դասերին, ինքը բաժանել է ԱԺ պատգամավորներին և 131-ից միայն 5 պատգամավոր է թերթել, մեկը՝ կարդացել:
Տաթև ՀԱՐՈՒԹՅՈԻՆՅԱՆ
ՀՀ պետականությունը աղու~ց ի վեր խայտառակված է հհկ բթամիտ բարբաջանքների և կործանարար քաղաքականության արդյունքում….