Դպրոցը ստեղծվել է Վանաձորում գործող
Քարհանյան ուսումնական կենտրոնի հիմքի վրա
Վանաձորում գործող Քարհանյան ուսումնական կենտրոնն արդեն մեկ տարի է՝ ընդլայնել է իր գործունեության շրջանակները:
2012 թվականից գործող ուսումնական կենտրոնի հիմքի վրա ստեղծված օնլայն դպրոցը հնարավորություն է տալիս ոչ միայն վանաձորցուն, այլ նաեւ նրա տարածքից դուրս ապրող մարդկանց կրթվելու եւ խորացնելու ունեցած գիտելիքները:
«2012 թ.-ին հիմնադրել եմ Քարհանյան ուսումնական կենտրոնը, որը նորույթ էր Վանաձորում: Կենտրոնում իրականացվում են լեզուների ուսուցում, համակարգչային դասընթացներ եւ դասապատրաստում: 2013թ.-ին ուսումնական կենտրոնի հիմքի վրա ստեղծեցինք օնլայն դպրոց, որը իր տեսակի մեջ այս պահին եզակի է Հայաստանում, քանի որ մենք օնլայն իրականացնում ենք լեզուների ուսուցում, համակարգչային դասընթացներ եւ կատարում դասապատրաստում»,- «Առավոտի» հետ զրույցում ասում է Քարհանյան ուսումնական կենտրոնի եւ Քարհանյան օնլայն դպրոցի հիմնադիր, Վանաձորի թիվ 27 հիմնական դպրոցի տնօրեն Գարեգին Քարհանյանը` տեղեկացնելով, որ օնլայն դպրոցում սովորողներ ունեն ինչպես Երեւանից ու այլ մարզերից, այնպես էլ Հայաստանի սահմաններից դուրս՝ ՌԴ- ից, Դուբայից, ԱՄՆ-ից` առանց տարիքային սահմանափակման:
Կարդացեք նաև
Դպրոցում հայոց լեզուն ուսուցանվում է երկու լեզուներով եւ բոլոր տարիքային խմբերի համար:
«Հայոց լեզու ենք ուսուցանում երկու լեզուներով` ռուսերենով եւ անգլերենով` բոլոր տարիքային խմբերի համար, քանի որ բավականին շատ մարդիկ կան, ովքեր գտնվում են Հայաստանից դուրս` սփյուռքում եւ ցանկանում են, որ իրենց երեխաները հայերեն սովորեն, չկտրվեն հայրենիքից, մենք այդ հնարավորությունը տալիս ենք նրանց»,- ասում է ուսումնական կենտրոնի եւ օնլայն դպրոցի հիմնադիրը:
Նա նկատում է, որ օնլայն կրթությունը մեծ հնարավորություններ է ստեղծում սովորել ցանկացողների համար:
«Ընդհանրապես, աշխարհը գնում է դեպի ավելի հարմարավետ կրթության եւ փորձում է կրթությունը հասանելի դարձնել բոլորին: Օնլայն կրթությունը մեզ տալիս է այդ հնարավորությունը: Մարդիկ կան, ովքեր ժամանակ չունեն սովորելու, աշխատում են, օրինակ, նրանց հետ մենք պարապում ենք երեկոյան կամ առավոտյան: Մարդիկ էլ կան` հնարավորություն չունեն լավագույն մասնագետների մոտ գնալու, հնարավորություն չունեն լավագույն դասագրքերով կրթվելու: Այսինքն` կրթության այս ձեւը բավականին ճկուն է` բոլոր շահագրգիռ շահառուների պահանջները բավարարելու համար»,- ասում է Գարեգին Քարհանյանը:
Նա տեղեկացնում է, որ կենտրոնում սկսվելու են հայերենի, պատմության եւ հայոց եկեղեցու անվճար պարապմունքներ:
«Կարող է լինել շաբաթական մեկ-երկու դաս, մենք նաեւ տեսադասեր ենք պատրաստում այդ առարկաների համար, որոնք տեղադրվելու են մեր կայքում: Այսկերպ հնարավորություն ենք տալու սովորել ցանկացող, բայց վճարել չկարողացող մարդկանց, ինչպես նաեւ սփյուռքում ապրողներին գիտելիքներ ձեռք բերել: Այդ ձեւով սկսելու ենք նաեւ անգլերենի եւ ռուսերենի շաբաթական մեկ օր անվճար դասընթաց»,- եզրափակում է Գարեգին Քարհանյանը` հավելելով, որ մոտ ապագայում էլ նպատակ ունեն օնլայն անվճար դասընթացներ կազմակերպել հաշմանդամություն ունեցող երեխաների համար:
ԱՆՈՒՇ ԲՈՒԼՂԱԴԱՐՅԱՆ
«Առավոտ» օրաթերթ
04.06.2014
